Bæði krossband og sin gáfu sig í hægra hné Þórarins

Þórarinn Ingi Valdimarsson verður lengi frá eftir að hafa meiðst illa á hné í leik á móti Fylki í Pepsi Max deild karla um síðustu helgi.

Þórarinn Ingi þurfti að fara af velli á þrettándu mínútu leiksins og var fluttur á sjúkrahús.

Stjarnan segir frá meiðslum Þórarins Inga á Twitter-síðu sinni í dag og það er ljóst að þau eru mjög alvarleg.

Þórarinn Ingi sem slasaðist í síðasta leik verður lengi frá en myndataka hefur leitt í ljós að bæði sin og krossband gáfu sig í hægra hné auk þess sem áverkar urðu á liðböndum. Við óskum Tóta góðs gengis í endurhæfingunni og hlökkum til að sjá hann á vellinum næsta sumar. pic.twitter.com/8dfF2njFXH

— Stjarnan FC (@FCStjarnan) June 28, 2019

Hægra hné Þórarins Inga fór mjög illa þarna því bæði krossband og sin gáfu sig auk þess sem áverkar urðu á liðböndum.

Þessar fréttir þýða að tímabilið er búið hjá Þórarni Inga en hann nær sér vonandi góðum fyrir næsta sumar.

Þórarinn Ingi Valdimarsson er 29 ára gamall og er á sínu öðru tímabili með Stjörnuliðinu. Hann kom í Garðbæinn frá FH en er upprunalega frá Vestmannaeyjum.