Sakar fyrrum upplýsingafulltrúa ríkisstjórnar um rangfærslur

Ritstjóri vefmiðilsins Kjarnans sakar fyrrum upplýsingafulltrúa ríkisstjórnar Sigmundar Davíðs Gunnlaugssonar um rangfærslur og samsæriskenningar um miðilinn. Í grein í tímaritinu Þjóðmálum setur upplýsingafulltrúinn spurningamerki við að Kjarninn geti átt rétt á ríkisstyrkjum til fjölmiðla verði þeir að veruleika.

Sigurður Már Jónsson, fyrrum upplýsingafulltrúi ríkisstjórnar Sjálfstæðisflokk og Framsóknarflokks og fyrrverandi varaformaður Blaðamannafélags Íslands, fullyrðir að Kjarninn hafi verið settur á fót af vinstrimönnum til að veita ríkisstjórninni sem hann starfaði fyrir mótstöðu árið 2013. Þetta kemur fram í grein sem hann skrifar í Þjóðmál.

Í greininni, sem ber fyrirsögnina „Kjarninn - að kaupa sig til áhrifa“, staðhæfir Sigurður Már að rekstur Kjarnans sé þungur, lesturinn lítill, takmörkuð frumvinnsla frétta eigi sér stað á ritstjórn miðilsins sem hafi ennfremur rík tengsl við vinstrisinnaða flokka og fjölmiðla. Setur hann það í samhengi við fjölmiðlafrumvarp sem er í vinnslu hjá ríkisstjórninni. Rætt hefur verið um að með því yrði kveðið á um ríkisstyrki til fjölmiðla sem uppfylli ákveðin skilyrði.

„Mikið álitamál er þó enn hvort miðillinn uppfyllir kröfur þær sem gerðar eru til styrkhæfra fjölmiðla, þar sem sáralítið er þar um frumframleiðslu frétta, en slíkt verður tíminn að leiða í ljós,“ skrifar Sigurður Már sem titlar sig sem blaðamann. Hann var um tíma ritstjóri Viðskiptablaðsins og stafaði einnig á Morgunblaðinu.

Fjölmiðlafrumvarp Lilju Alfreðsdóttur mennta- og menningarmálaráðherra hefur verið í burðarliðnum. Þar eru tillögur um styrki til einkarekinna fjölmiðla sem uppfylli ákveðin skilyrði. Dregist hefur á langinn að kynna það í ríkisstjórn en ráðherra segir í skriflegu svari við fyrirspurn Vísi að hún stefni enn á að leggja frumvarpið fram á vorþingi.

Segir reksturinn sjálfbæran

Í samtali við Vísi hafnar Þórður Snær Júlíusson, ritstjóri og einn stofnenda Kjarnans, fullyrðingum Sigurðar Más og segir grein hans fulla af rangfærslum og samsæriskenningum sem varða meðal annars stofnun Kjarnans, rekstur og hlutverk í fjölmiðlalandslaginu.

„Það er varla stafur þarna sem á sér stað í raunveruleikanum nema litlar upplýsingar úr ársreikningum,“ segir Þórður Snær sem furðar sig á því að maður sem hafi setið í stjórn Blaðamannafélagsins telji eðlilegt að skrifa grein sem þessa.

Sigurður Már vitnar í ársreikninga Kjarnans til og með 2017 sem sýna tap á rekstri miðilsins. Í svargrein sem Þórður Snær birti á Kjarnanum fullyrðir ritstjórinn að rekstur Kjarnans hafi verið sjálfbær frá haustinu 2017.

Þá vísar hann einnig á bug að hörgull sé á frumunnum fréttum á Kjarnanum, þvert á fullyrðingar fyrrum upplýsingafulltrúans. Fleiri en þúsund frumunnar fréttir og fréttaskýringar hafi verið birtar það sem af er ári. Um staðhæfingu Sigurðar Más að lestur kjarnans sé svo lítill að vefsíðan komist ekki á lista í vefmælingum bendir Þórður Snær á að Kjarninn taki ekki þátt í þeim. Gerði hann það væri Kjarninn reglulega í 6.-8. sæti yfir mest lesnu vefsíður landsins.

Ekki sé nýtt að reynt sé að spyrða Kjarnanum saman við stjórnmálaflokka. Segist Þórður Snær hins vegar klóra sér í hausnum yfir því hvernig Sigurði Má takist að bendla Kjarnann við afar ólíka stjórnmálaflokka, innan og utan ríkisstjórnar. Í greininni fullyrðir Sigurður Már að Kjarninn aðhyllist „borgaralega vinstristefnu“ Vinstri grænna, Samfylkingar og Viðreisnar.

Segir umfjöllun um mál blaðakonu ósmekklega

Sérstaklega er Þórður Snær þó ósáttur við umfjöllun Sigurðar Más um mál Báru Huldar Beck, blaðamanns Kjarnans, sem Ágúst Ólafur Ágústsson, þingmaður Samfylkingarinnar og fyrrverandi hluthafi í Kjarnanum, viðurkenndi í vetur að hafa áreitt. Hún svaraði síðar yfirlýsingu Ágústs Ólafs og gaf ítarlegri lýsingu á atvikinu en hann greindi frá.

Í grein sinni segir Sigurður Már að Kjarninn hafi ekki fjallað um atvikið fyrr en greint var frá því annars staðar og litlar fréttir hafi verið fluttar af viðbrögðum stjórnenda Kjarnans við því. Yfirlýsingar Ágústs Ólafs og Báru Huldar hafi verið látnar nægja sem umfjöllun. Þá fullyrðir hann að augljóst sé að Bára Huld hafi ekki verið ánægð með hvernig tekið var á máli hennar.

Þórður Snær segir að steininn hafi tekið úr þegar Sigurður Már hafi gert Báru Huld upp skoðanir um hvernig hún upplifði umfjöllun um atvikið sem hún varð fyrir.

„Það finnst mér ósmekklegt á stigi sem ég hef ekki séð áður,“ segir hann við Vísi.

Í svargrein sinni á Kjarnanum segir Þórður Snær jafnframt að viðbrögð stjórnenda hafi verið í samræmi við vilja Báru Huldar og að miðillinn hafi verið vanhæfur til að fjalla um málið efnislega í fréttaskrifum.

Bára Huld staðfesti við Vísi að Sigurður Már hefði ekki haft samband við sig áður en hann birti grein sína. Hún vildi ekki tjá sig frekar um fullyrðingar hans.

Sigurður Már Jónsson vildi ekki tjá sig um grein sín í Þjóðmálum við Vísi þegar eftir því var leitað í dag.