Ítalska ríkisstjórnin kemur sér saman um ný fjárlög

Ríkisstjórn hægriöfgaflokksins Bandalagsins og popúlistaflokksins Fimm stjörnu hreyfingarinnar hefur komið sér saman um ný fjárlög sem flokkarnir búast við að framkvæmdastjórn Evrópusambandsins fallist á. Framkvæmdastjórnin hafnaði fyrri fjárlagafrumvarpi Ítala þar sem hún var ekki talin standast fjármálareglur sambandsins.

Ekkert samkomulag liggur enn fyrir við ESB um fjárlögin. Matteo Salvini, varaforsætisráðherra og leiðtogi Bandalagsins, segir að í frumvarpinu sé kveðið á um niðurskurð sem muni „líklega“ falla í kramið í Brussel, að því er segir í frétt Reuters.

Framkvæmdastjórn ESB taldi frumvarp sem ítalska ríkisstjórnin lagði fram í október ekki draga úr miklum skuldum ríkissjóðs. Ítalir lögðu fram nýtt frumvarp í síðustu viku þar sem gert var ráð fyrir lægri fjárlagahalla sem nemur 2,04% af vergri landsframleiðslu næsta árs.

Samþykkja þarf fjárlög fyrir árslok. Ítalir eiga á hættu refsiaðgerðir af hálfu Evrópusambandsins nái þeir ekki saman um fjárlög sem draga úr skuldum ríkisins.