Jón Arnór: Nýir leikmenn taka við og gera framtíðina spennandi og skemmtilega

Besti körfuknattleiksmaður Íslands hefur átt betri daga en í dag en var stoltur af sínum mönnum og var sammála því að sóknarleikurinn hafi kostað Ísland sigurinn.

„Við börðumst allan tímann og gáfum okkur alla í verkefnið. Ég hitti klárlega ekki á minn besta dag og það var erfitt á köflum. Þeir lokuðu vel á okkur og við hittum ekki nógu vel og svo var þetta svolítið stirðbusalegt á köflum. Eins og ég hef sagt áður þá vantar svolítið mikið þegar Martin er ekki með en hann er svona leikmaður sem nær að brjóta upp leikinn fyrir okkur. Svo vantar Kára og Hauk líka og þetta eru þrír stórir póstar og sérstaklega sóknarlega,“ sagði Jón Arnor Stefánsson að loknu 66-79 tapi fyrir Belgum í forkeppni Eurobasket í Laugardalshöll í kvöld.

„Ég hef svo sem ekkert mikið um framhaldið að segja, framtíðin er eins og hún er. Það eru kynslóðaskipti og það er verkefnið núna, leikurinn í dag er líklega sá síðasti sem ég spila einhverjar mínútur en svo er sá kafli búinn og nýjir leikmenn taka við og byggja upp aftur og gera þetta að spennandi og skemmtilegri framtíð. Það er bara gaman, við erum með fullt af hörku góðum spilurum sem geta spilað vörn og gefið alla orku í þetta og verið klókir“.

Jón Arnór var síðan spurður út í það hvort staðreyndin að 11 af 12 leikmönnum í íslenska hópnum spila í Dominos deildinni sýni styrk deildarinnar.

„Já það segir ýmislegt. Dominos deildin er sterk og það skiptir máli að menn séu að hugsa um sjálfan sig og æfa eins og þeir séu að stefna á að fara út. Þetta eru samt leikmenn sem hafa spilað erlendis og Elvar hefur bætt sig helling og Kristó kemur mjög sterkur heim. Þetta eru strákar sem eru framtíðin og svo eigum við Martin, Hauk og Tryggva sem eru að spila mikið og vel. Svo var Kári Jónss. óheppinn með þessi meiðsli sem hann lendir í en hann kemur sterkari til baka. Ég hef litlar áhyggjur af þessu og það verður gaman að fylgjast með framtíðinni“.