Stærsta körfuboltakona heims gnæfir yfir mót­herja sína

Ziyu Zhang er aðeins 19 ára gömul en hæð hennar á körfuboltavellinum er gríðarleg. Hún er tveir metrar og 23 sentímetrar og hefur staðið sig vel undir körfunni hjá kínverska liðinu. Hún skoraði mikilvæg þrettán stig þegar Kína vann nauman þriggja stiga sigur á Puerto Rico í gærkvöldi. Hún tók líka átta fráköst og skoraði sjö stig gegn Frökkum í 8-liða úrslitum í dag en það dugði skammt í 90-61 tapi.

Það er þó ekki alltaf þægilegt að vera svona hávaxin en kínverska liðið þurfti að biðja hótelið sem liðið gistir á um stærra rúm. Hún passaði ekki í rúmið sem var í herberginu hennar og komu hótelstarfsmennirnir með stærra rúm fyrir hana.

Ziyu Zhang kemur úr mikilli körfuboltafjölskyldu þar sem báðir foreldrar hennar spila körfubolta. Hún segir þó að hæðin hennar láti hana líta út fyrir að vera þroskaðri en hún er en inn við beinið er hún ung 19 ára stelpa.

Meðalhæð leikmanna í NBA-deildinni er tveir metrar og er hún því meira en 20 sentímetrum hærri en meðal NBA-leikmaðurinn. Hún er þó mikið hærri en allar stelpurnar á heimsmeistaramótinu og sást munurinn greinilega þegar hún mætti minnsta leikmanni mótsins. Það er Katerina Zeithammernova sem leikur með tékkneska landsliðinu en hún er 162 sentímetrar á hæð. Það voru því 61 sentímetri á milli þeirra og var því erfitt fyrir tékkneska leikmanninn að reyna að dekka Zhang.

Kínverska körfuboltagoðsögnin Yao Ming var tveir 229 sentímetrar og því aðeins sex sentímetrar milli hans og Zhang. Stærsti körfuboltamaður allra tíma er Sun Mingming sem er einnig frá Kína. Hann komst þó ekki í NBA-deildina og spilaði aðeins í neðri deildum Bandaríkjanna.