Óli Jó: Getur ekki verið að Hamrén hafi valið þennan hóp

Ólafur Jóhannesson, þjálfari Íslandsmeistara Vals og fyrrverandi landsliðsþjálfari, segir að hann hafi viljað sjá Erik Hamrén velja yngri leikmenn í síðasta landsliðshóp. Ólafur var í viðtali hjá RÚV.

Hann segir einnig að það sé sýnilega þreyta í íslenska landsliðshópnum en þessi mikli sigurvegari segir að þetta verði ekki öfundsvert verkefni Hamrén.

„Auðvitað er árangur landsliðsins búinn að vera geggjaður undanfarin ár, hjá Lars og Heimi, og nánast farið fram úr væntingum flestra,” sagði Ólafur í samtali við RÚV en sagði að næstu ár gæti verið erfið:

„Ég held það verði erfitt hjá landsliðinu næstu árin. Nýi þjálfarinn [Erik Hamrén] er ekki öfundsverður af því hlutverki sem hann er að taka að sér. Það er eitthvað sem segir mér það. Þessi hópur er búinn að vera lengi saman og það er greinilega einhver þreyta inni í hópnum.“

„Þannig að ég held að þetta verði erfitt, en ég hef svo sem sagt það áður. Þeir eru náttúrulega ótrúlegir þessir drengir þeir gætu snúið þessu öllum saman við aftur.“

Í síðasta landsliðshóp Íslands sem lék gegn Sviss og Belgíu voru ekki margir ungir leikmenn. Ólafur vill að Hamrén nýti tækifærið og yngi upp sem fyrst.

„Auðvitað þarf að yngja þetta upp, ég vil meina það. Ég var mjög ósáttur við margt sem var valið í þessa tvo leiki. Enda held ég að hann hafi ekki valið það, þessi Hamrén, það getur ekki verið.”

„Það hafa aðrir menn valið þetta fyrir hann. Af því að hann var ráðinn landsliðsþjálfari þegar voru tíu dagar í leik, hann þarf að fá einhverja aðstoð til að velja leikmennina því hann þekkir það ekki sjálfur,” sagði Ólafur og bætti við að lokum:

„En ég held að hann eigi eftir að setja sinn svip á þetta og vonandi verður það gott.“