Ástþór Atli með stórleik í sigri Íslands

Ísland vann sannfærandi sigur nú rétt í þessu á Ungverjalandi í þriðja leiknum sínum í B-deild Evrópumóts 16 ára og yngri.

 

Í gær tapaði liðið fyrir Pólverjum en frammistaðan í dag var mikið betri. Ástþór Atli Svalason átti stórleik í liði Íslands en hann skoraði 31 stig. Næst stigahæsti leikmaður Íslands var Friðrik Anton Jónsson með ellefu stig.

 

Það voru þó Ungverjar sem byrjuðu leikinn betur og voru yfir eftir fyrsta leikhluta en eftir það náði Ísland yfirhöndinni og vann að lokum sigur 74-63.

 

Næsti leikur Íslands er gegn Búlgaríu á mánudaginn.