Skellur gegn Ísrael

Íslensku strákarnir í körfuboltalandsliðinu skipað drengjum átján ára og yngri fengu skell gegn Ísrael, 92-60, í lokaleik riðilsins á EM U18 í Skopje.

Ísland er því með einn sigur og fjóra tapleiki en er með jafn mörg stig og Lúxemborg og Makedónía í þremur neðstu sætunum.

Makedónía spilar í kvöld gegn Tékklandi svo það ræðst ekki fyrr en síðar í kvöld um hvaða sæti strákarnir okkar spila.

Ísrael voru sterkir í fyrsta leikhluta. Þeir hittu vel og voru fimm stigum yfir eftir hann, 24-19, og svo tíu stigum yfir er liðin gengu til búningsherbergja 44-34.

Það var kraftur í íslenska liðinu í upphafi síðari hálfleiks og náðu þeir að minnka muninn niður í fimm stig strax í upphafi þriðja leikhluta en þá vöknuðu Ísraelsmenn aftur.

Ísrael náði átján stiga forystu í upphafi fjórða leikhluta og sigldu sigrinum að lokum örugglega í hús en lokatölur urðu 32 stiga sigur Ísrael, 92-60. Fjórði tapleikur Íslands staðreynd.

Stigahæstur var Hilmar Henningsson með 23 stig en auk þess tók hann sjö fráköst. Sigvaldi Eggertsson kom næstur með 13 stig og sjö fráköst.