Heimir þreyttur á klappinu

Nú, þegar aðeins sólarhringur er í að Ísland leiki sinn fyrsta leik á heimsmeistaramótinu í knattspyrnu, eru erlendir miðlar undirlagðir af fréttum um íslenska landsliðið.

„Öskubuskuævintýri,“ segir Fox um velgengni Íslands- „Lionel Messi þarf heimsmeistaratitil á meðan Íslendingar eru bara kátir að fá að vera með,“ - segir LA Times og Reuters tekur í sama streng. Argentínumenn hafa öllu að tapa en Íslendingar allt að vinna.

Fleiri stef eru þó fyrirferðamikil í umfjöllunum dagsins; til að mynda ótrúleg saga tannlæknisins Heimis Hallgrímssonar og hið víðfræga víkingaklapp. Frétt breska götublaðsins Sun sameinar þau bæði - því þar segir landsliðsþjálfarinn að hann sé kominn með nóg af klappinu.

„Þessa stundina hata ég það. Það er dálítið ofnotað,“ er haft eftir Heimi.

„Það var fínt, þetta var ákveðið augnablik en núna, þegar maður gengur niður götuna, byrjar fólk að klappa,“ segir Heimir og bætir við að það séu einna helst útlendingar sem klappi á hann.

„Það var okkar, þó svo að við höfum stolið því frá Skotlandi - en nú er það orðið alþjóðlegt þannig að við þurfum að finna eitthvað nýtt.“

Heimisgrýlan

Heimir er jafnframt þungamiðjan í nýrri umfjöllun New York Times um íslenska fótboltaævintýrið. Þar kemur meðal annars fram að vegna þjálfunarstarfa hafi Heimir ekki brugðið sér í hlutverk Leppalúða í árlegu jólaboði í Vestmannaeyjum. Í samtali við blaðið segir frændi Heimis að hann viti ekki hver fyllti í skarðið hans - „en hann var ekki jafn illkvitinn og Heimir.“

Tannlæknastörf Heimis vekja alla jafna mikla athygli í erlendum miðlum og bera nýlegar umfjallanir þess merki. Í fyrrnefndu viðtali við New York Times segir Heimir að tannlæknastússið sé róandi. „Sumir þjálfarar spila golf, skjóta hreindýr, hvað sem er - allir eru með eitthvað. Mér finnst hins vegar gaman að koma aftur heim til skjólstæðinganna minna,“ er haft eftir Heimi.

Þessi tilvitnun þykir svo áhugaverð að hún rataði á listann yfir áhugaverðustu ummæli dagsins á NY-Times. Það verður að teljast ákveðinn gæðastimpill, í ljósi þeirra tuga ef ekki hundruð viðtala sem birtast á miðlum stórtímaritsins á hverjum degi.

Í umfjöllun Fox News er það hugarfar íslenska landsliðsins sem ratar á blað. Þar er haft eftir Heimi að þrátt fyrir smæðina viti landsliðsmennirnir að þeir eigi jafn skilið að vera á heimsmeistaramótinu eins og önnur lið. „Og í því felst styrkur liðsins. Þeir vita nákvæmlega fyrir hvað þeir standa. Við erum ekki að reyna að vera eitthvað sem við erum ekki - og þegar öllu er á botninn hvolft verður það styrkleikinn okkar,“ segir Heimir.

Þá þykir hinn víðtæki stuðningur sem íslenska landsliðið hefur fengið einnig fréttnæmur. Þannig er til að mynda heljarinnar úttekt í National Geographic um hina pólsku stuðningsmenn íslenska landsliðsins.

Þar er rætt við Pólverja sem búsettir eru á Íslandi og lýsa þeir því hvernig þeir spegla sig í íslenska landsliðinu. „Pólverjar og Íslendingar eru með sameiginleg gildi, eins og hugrekki og að gefast aldrei upp,“ segir Tomasz Kwiatkowski í samtali við National Geographic. „Íslenska landsliðið er holdgervingur þessara gilda.“

Það eru þó ekki aðeins Pólverjar sem heillast af Íslandi - nafntogaðir Þjóðverjar eru líka hrifnir. Þeirra á meðal er Jürgen Klopp, þjálfari enska knattspyrnuliðsins Liverpool. Hann fór í skíðaferð til Íslands í fyrra og í samtali við Punch segir Klopp að það hafi verið ein besta upplifun lífs síns. Hann segir að íslenska fótboltaævintýrið sé ótrúlegt, í ljósi fámennisins.

Þjóðverjinn segir það minna sig helst á uppruna fótboltans - „Það er eins og uppruni alls, þú þarft ekki mikið af fólki - bara réttu einstaklingana til að skipta sköpum. Þeir [Íslendingar] hafa áorkað svo miklu í fótbolta,“ segir Klopp sem áður hefur talað fallega um Íslands. Sagði hann til að mynda í upphafi árs að „Íslenskur sigur á HM væri stærsta stund fótboltasögunnar“

Í frétt Punch er jafnframt vísað í nýlega könnun í Þýskalandi sem gefur til kynna að um 76,8% Þjóðverja muni styðja Íslendinga á HM - að því gefnu að lið Þýskalands og Íslands mætist ekki á mótinu.

Þeir ættu því óhræddir að geta stutt Ísland þegar það mætir Argentínu í Moskvu klukkan 13 að íslenskum tíma á morgun.

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á Facebook, Twitter og Instagram