23 dagar í HM: Þegar Rijkaard hrækti í permóið á Völler

Það hefur alltaf andað köldu á milli Hollendinga og Þjóðverja en það sauð eftirminnilega upp úr á fótboltavellinum er liðin mættust á HM árið 1990.

Á vellinum í þeim leik voru margar stórar stjörnur og var fast tekist á. Meira að segja hinn dagfarsprúði Marco van Basten gerði sig sekan um ljótt brot í leiknum er hann negldi niður Lothar Matthäus, miðjumann Vestur-Þjóðverja.

Spennustigið í leiknum var afar hátt frá upphafi og í raun ekki spurning um hvort heldur hvenær það myndi sjóða upp úr í leiknum.

Suðan byrjaði að koma upp úr pottinum er Hollendingurinn Frank Rijkaard fékk gult spjald fyrir að brjóta á framherjanum Rudi Völler. Sá þýski gerði sér mat úr brotinu og það kunni Rijkaard illa að meta. Er þeir hlupu inn í teiginn þá hrækti Rijkaard í þykkan hnakka Völler sem var með eitt besta permanent sögunnar. Rijkaard skartaði reyndar lítið síðra permói.

Aukaspyrnan var tekin og þá urðu aftur átök. Völler fer á eftir boltanum en nær ekki til hans á undan markverði Hollendinga, Hans van Breukelen. Völler hoppar upp (til þess að lenda ekki á markverðinum að eigin sögn) en Hollendingar töldu hann vera að reyna að fiska vítaspyrnu.

Fyrstur á vettvang var að sjálfsögðu Rijkaard. Völler lá í grasinu en Rijkaard teygði sig niður til hans, traðkaði aðeins á honum og snéri svo upp á eyra Þjóðverjans.

Á þessum tímapunkti fékk argentínski dómarinn Juan Carlos Loustau nóg af þeim báðum. Gaf þeim báðum gult spjald og fyrir vikið voru þeir báðir á leið í sturtu. Rijkaard nýtti þá tækifærið og hrækti aftur á Völler. Alveg með ólíkindum. Rijkaard fékk uppnefnið Lamadýrið eftir þessar hrákur.

Völler sýndi mun meiri þroska í þessum átökum og skokkaði af velli en þegar hann fór að skokka af stað héldu margir að hann ætlaði í Hollendinginn. Sá hollenski þó heljarmenni og því líklegt að Völler hefði haft lítið í þann slag að gera.

Flestir voru þó sammála því að það hefði verið glórulaust að reka Völler af velli á meðan hinn var að hrækja á hann. Enn í dag segist Völler ekki skilja af hverju hann fékk að fjúka út af. Aðeins voru liðnar 22 mínútur af leiknum er þeir fóru í sturtu.

Vestur-Þýskaland vann leikinn 2-1 með mörkum frá Jürgen Klinsmann og Andreas Brehme en Ronald Koeman minnkaði muninn með marki úr vítaspyrnu á 89. mínútu. 

Vestur-Þjóðverjar fóru því í átta liða úrslit og urðu síðan heimsmeistarar með 1-0 sigri á Argentínu í úrslitaleiknum.

Völler og Rijkaard þekktust ágætlega fyrir þennan leik en báðir voru að spila á Ítalíu. Fimm mánuðum síðar er lið þeirra mættust í ítalska boltanum þá baðst Rijkaard afsökunar. Sagðist hafa verið undir miklu álagi og nýbúinn að skilja. Hann hefði ekki höndlað álagið.

„Ég hafði rangt fyrir mér þennan dag. Völler gerði mér ekkert eða móðgaði mig á nokkurn hátt. Ég hef alltaf borið virðingu fyrir Völler en ég gekk af göflunum þennan dag. Ég bað hann strax afsökunar eftir leik og hann þáði þá afsökunarbeiðni,“ sagði Rijkaard.

Nokkrum árum síðar grófu þeir öxina formlega er þeir léku saman í smjörauglýsingu. Laun beggja fyrir auglýsinguna runnu til góðgerðarmála og þar lauk þessari deilu formlega.