Zlatan segist sakna sænska landsliðsins: Verður hann með á HM?

Íslenska fótboltalandsliðið er á leiðinni á HM í fótbolta í Rússlandi í sumar og kannski Zlatan Ibrahimovic líka.

Zlatan Ibrahimovic var búinn að setja landsliðsskóna upp á hillu en hann hefur nú opnað fyrir möguleikann á að snúa aftur í landsliðið fyrir HM.

„Ég sakna landsliðsins,“ sagði Zlatan Ibrahimovic við SportExpressen.

„Þegar þú hefur spilað með liði í tuttugu ár þá er erfitt að sjá aðra vera að spila í staðinn fyrir þig. Sérstaklega þegar þú ert meiddur. Maður vill spila bæði í landsliðinu og með félagsliðinu. Þeir hafa verið að gera góða hluti,“ sagði Zlatan.

Zlatan öppnar för comeback i Blågult: "Jag saknar landslaget"https://t.co/GMjlA6gL6Epic.twitter.com/RdfxOzm2ZV

— SportExpressen (@SportExpressen) March 1, 2018

Zlatan hætti í landsliðinu eftir EM í Frakklandi 2016. Síðasti leikurinn hans var á móti Belgíu í riðlakeppninni en Svíarnir komust ekki áfram upp úr riðlinum.

En mun Zlatan segja já ef Janne Andersson hringir í hann og býður honum sæti í sænska landsliðinu?

„Við skulum sjá til. Sjáum til. Þetta er erfið spurning. Ég vil vera valinn af því að ég er að spila vel. Ég vil ekki vera valinn af því að ég er eitthvað nafn,“ sagði Zlatan sem hefur lítið spilað með liði Manchester United eftir að hann kom til baka eftir krossbandaslit.

„Dyrnar eru ekki lokaðar. Fyrst þarf ég að fara að spila fótbolta því við getum ekki talað um landsliðssæti á meðan ég er ekki að spila. Ég lifna samt allur við með því að tala um þetta,“ sagði Zlatan.

Zlatan Ibrahimovic var með 62 mörk í 116 landsleikjum frá 2001 til 2016. Hann markahæsti leikmaður sænska landsliðsins frá upphafi og sá sjötti leikjahæsti.

Svíar eru í F-riðli á HM í Rússlandi en þar mæta þeir í riðlakeppninni Suður-Kóreu, Þýskalandi og Mexíkó.