Virðist hafa skotið flugeldum inn í hóp fólks við Hallgrímskirkju

Lögreglan á höfuðborgarsvæðinu óskar eftir vitnum að atviki sem átti sér stað á nýársnótt, rétt eftir miðnætti. Svo virðist sem að einstaklingur hafi vísvitandi skotið flugeldum inn í hóp manna sem voru staddir við Hallgrímskirkju.

Í tilkynningu frá lögreglu segir að fimm ferðamenn hafi verið staddir við kirkjuna, en flugeldurinn virðist hafa sprungið í hópnum með þeim afleiðingum að einn ferðamannanna fékk brunasár, meðal annars í andliti.

Þeir sem kunna að hafa upplýsingar um atvikið, til dæmis hver það var sem skaut umræddum flugeldum, er beðinn um að hafa samband við lögregluna á höfuðborgarsvæðinu, gegnum einkaskilaboð á Facebook-síðu embættisins, í símann 444-1000 eða í netfangið jon.orn@lrh.is.