Martin frábær í Evrópusigri

Martin Hermannsson átti frábæran leik fyrir Alba Berlin sem vann níu stiga sigur, 102-93, á franska liðinu Limoges í Evrópubikarnum.

Alba Berlín byrjaði mjög vel og var sex stigum yfir eftir fyrsta leikhlutann, 26-20. Þeir slökuðu ekkert á í öðrum leikhluta og voru með gott forskot í hálfleik, 56-39.

Í síðari hálfleik náðu Frakkarnir hægt og rólega að saxa á forskot Berlínar-liðsins en nær komust þeir. Góður sigur Martins og félaga, 102-93.

Martin átti ansi flottan leik. Hann skoraði sextán stig á rúmum hálftíma en auk þess tók hann tvö fráköst og gaf þrjár stoðsendingar.

Alba er því með fjögur stig eftir fyrstu þrjá leikina í B-riðlinum en í riðlinum eru leiknir tíu leikir.