Skaut fimm lögreglumenn í Suður-Karólínu

Fimm lögreglumenn voru skotnir í grennd við borgina Florence í Suður-Karólínu í Bandaríkjunum í kvöld. Ekki liggur fyrir á þessari stundu hvort þeir séu alvarlega særðir.

Lögregluyfirvöld í Florence hefur upplýst að einn maður sé í haldi, grunaður um verknaðinn.

Tilkynning barst lögreglu skömmu fyrir klukkan 17 að staðartíma að fimm lögreglumenn hafi verið skotnir við Vintage Place í borginni. Hófst þá umfangsmikil leit að árásarmanninum og var greint frá því að hann hafi verið gripinn, um klukkustund eftir að tilkynningin kom fyrst inn á borð lögreglu.

Lögregla hefur hvatt almenning til að halda sig fjarri Vintage Place.

Uppfært 23:45:

USA Today greinir frá því að einn lögreglumannanna sem var skotinn hafi látist af sárum sínum.