Hrafn má ekki innlima lóð undir blótstaðnum

Kvikmyndaleikstjórinn Hrafn Gunnlaugsson fær ekki að innlima í lóð sína skika undir svokölluðum hörgi nærri íbúðarhúsi hans í Laugarnesi.

Hrafn sendi umsókn um miðjan janúar til Reykjavíkurborgar um að fá að stækka lóð sína á Laugarnestanga 65. Sagði hann það vera vegna hörgs „sem merktur var ásum og vönum þann 1. júní 2015 af Hilmari Erni Hilmarssyni allsherjargoða“. Hörgur er blótstaður heiðinna manna.

Ekki náðist í Hrafn en í umsókn hans kemur fram að hörgurinn skarti líkneski af ásnum Frey. „Allsherjargoðinn hefur síðan framkvæmt þar ýmsar helgar athafnir ásatrúar,“ upplýsir leikstjórinn.

Öllum frjáls umferð

Hrafn segir að í Verndaráætlun fyrir Laugarnestanga undirskrifaðri af Degi B. Eggertssyni borgarstjóra sé tilvera hörgsins staðfest. Þar segir að öllum sé frjáls umferð um hörginn.

„Hörgurinn nær niður fyrir fjöruborð að hluta til en sjór ber möl og þara inn í hann á háflæði og gerir kynngi hans enn magnaðri,“ lýsir Hrafn og útskýrir hvers vegna sameina eigi skikann lóð hans sjálfs. „Óskandi væri að hörgurinn stæði ótvírætt allur inn á lóðinni, með tilliti til allra er að málinu koma.“

Í umsögn embættis skipulagsfulltrúa um erindi Hrafns segir að samkvæmt lóðarskilmálum sé ekki leyfilegt að afmarka lóðir í Laugarnesi með girðingum, mönum, limgerði eða öðru né að loka gönguleiðum með strandlengju. „Opna svæðið við Laugarnestanga er skilgreint sem borgargarður og á svæðinu er mikið um búsetuminjar og ströndin að mestu ósnortin. Allur tanginn er skilgreindur sem hverfisverndarsvæði.

Þannig leggur skipulagsfulltrúi til að stækkun lóðar Hrafns verði ekki samþykkt. „Samræmist ekki gildandi skipulagi og ekki talin ástæða til að lóðin innihaldi umræddan hörg þar sem gengur töluvert á opna svæðið að aðgengi almennings meðfram strandsvæðinu.“

Hörgur er blótstaður

Talið er hörgar hafi upphaflega verið blótstaðir undir berum himni, líklega steinaltari. Á þetta bendir uppruni orðsins hörgur. Í Eddukvæðunum er getið um hörg, sem hlaðinn var úr steinum. Stundum virðast hörgarnir hafa verið hús. Getið er um hörga sem brunnu, og um hátimbraða hörga.

Á Íslandi hafa fundist tóftir sem talið er að séu af fornum hörgum og hefur ein þeirra verið rannsökuð. Kom þá í ljós að hörgurinn hefur verið hús í líkingu við hof en miklu minni.

Heimild: Wikipedia.