Ívar hættur með kvennalandsliðið

Ívar Ásgrímsson er hættur sem landsliðsþjálfari Íslands í körfubolta kvenna en hann staðfesti þetta eftir tap gegn Bosníu í kvöld.

Ívar greindi frá þessu í viðtali við Hauk Harðarson á RÚV eftir leikinn en undankeppninni lauk með tapi gegn Bosníu, 84-74, á heimavelli í kvöld.

Ívar tók við landsliðinu í apríl 2014 en samhliða hefur hann einnig þjálfað karlalið Hauka í Dominos-deild karla.

Hann sagðist hafa tekið þessa ákvörðun í sumar og sagði að þetta færi afar illa saman að vera bæði þjálfari hjá félagsliði og landsliði.

Haukamaðurinn sagðist þó gera sér í hugarlund að vera í kringum liðið í einhverri mynd.