Hjörtur í bikarúrslit annað árið í röð

Hjörtur Hermannsson og félagar hans í Bröndby eru komnir í úrslitaleik danska bikarsins annað árið í röð en þetta varð ljóst eftir 3-1 sigur á Midtjylland í kvöld.

Liðin eru í toppsætunum tveimur í úrvalsdeildinni og ljóst að um athyglisverða rimmu væri að ræða. Silkeborg tryggði sér sæti í úrslitunum í gær með sigri á B-deildarliði Frederica.

Það byrjaði vel fyrir Bröndby því það leið ekki ein mínúta frá því að leikurinn hófst að Bröndby var komið yfir. Pólski framherjinn Kamil Wilczek kom þeim yfir strax í upphafi.

Teemu Pukki tvöfaldaði forystuna á fimmtándu mínútu og þannig stóðu leikar allt þangað til á 48. mínútu er Gustav Wikheim minnkaði muninn fyrir Midtjylland, 2-1.

Kamil Wilczek skoraði annað mark sitt og þriðja mark Bröndby á 65. mínútu og innsiglaði 3-1 sigur Bröndby sem er því komið í úrslitaleikinn annað árið í röð.

Í fyrra tapaði liði fyrir grönnunum í FCK, 3-1, en nú mætir liðið Silkeborg. Hjörtur Hermannsson spilaði allan leikinn fyrir Bröndby.