Martin frábær í öruggum sigri

Martin Hermannsson spilaði afar vel er Alba Berlín vann sigur á Göttingen, 95-68, í þýsku úrvalsdeildinni í körfubolta í kvöld.

Berlín byrjaði leikinn af miklum krafti fyrir framan níu þúsund áhorfendur í Berlín en þeir leiddu 29-10 eftir fyrsta leikhlutann.

Þar settu þeir tóninn en þeir slökuðu aðeins á í þriðja leikhluta þar sem gestirnir minnkuðu muninn. Sigurinn þó aldrei í hættu hjá Alba sem vann að lokum stórsigur, 95-68.

Martin var öflugur í liði Alba en hann hefur spilað afar vel á tímabilinu. Hann skoraði sautján stig, tók þrjú fráköst og gaf fjórar stoðendingar í kvöld.

Alba er með fimm sigra í fyrstu fimm leikjunum og er á toppnum ásamt Bayern Munchen sem er einnig með fullt hús stiga.