Brjálæðingarnir á bak við tjöldin fá mikið lof frá fyrirliðanum

Aron Einar Gunnarsson, landsliðsfyrirliði í fótbolta, er klár í slaginn fyrir stórleikinn á móti Nígeríu á HM 2018 annað kvöld sem fram fer í Volgograd.

Miðjumaðurinn öflugi var ekki búinn að spila fótboltaleik í sex vikur þegar kom að leiknum gegn Argentínu í fyrstu umferð riðlakeppninnar en hann spilaði 75 mínútur og stóð sig frábærlega.

Hann ætlaði aldrei að spila svona lengi og hefur áður viðurkennt að hann var alveg búinn á því þegar að hann skipti við Ara Frey Skúlason. Það tók sinn tíma að jafna sig en fyrirliðinn segist vera á góðum stað.

„Mér líður vel. Auðvitað tekur tíma að ná sér 100 prósent heilum, en það kom svona í gær. Þá fann ég að ég var orðinn 100 prósent aftur. Mér leið vel á æfingunni í dag og er búinn að safna þeirri orku sem að ég þurfti á að halda,“ segir Aron en hann svaraði spurningum á fréttamannafundi í Volgograd í dag.

„Það tekur á að vera ekki búinn að spila fótboltaleik heillengi og taka bara nokkrar æfingar fyrir leik og spila svo 75 mínútur. Það væri vitleysa að ætlast til þess að finna ekki fyrir neinu,“ segir fyrirliðinn.

Íslenska liðið er ekki með flestu starfsmennina á mótinu en þeir kunna sitt fag og leggja mikið á sig eins og strákarnir okkar inn á vellinum. Aron Einar eys lofi yfir mennina sem að halda þeim gangandi á milli leikja.

„Strákarnir allir náðu sér fljótt. Ég vil hrósa sjúkrateyminu okkar sem að er búið að vinna eins og brjálæðingar. Þau eru áns gríns með okkur til tólf á nóttunni þegar þess þarf. Við erum búnir að vera á fullu að ná okkur til baka og mér sýnist bara að menn séu klárir fyrir morgundaginn,“ segir Aron Einar Gunnarsson.

Vísir er með öflugt teymi í Rússlandi sem verður með ítarlegan fréttaflutning af íslenska liðinu á HM. Fylgist með á samfélagsmiðlum okkar - á Facebook, Twitter og Instagram.