Væri dauður eða í fangelsi ef ég hefði ekki rifið mig upp

Fyrrum knattspyrnuhetjan John Hartson er á góðum stað í dag en hann sökk djúpt á sínum tíma í veðmálafenið.

Hartson segir að þetta sé ekkert flókið. Hann væri dauður eða í fangelsi ef hann hefði haldið áfram á sömu braut.

„Konan mín pakkaði saman og fór. Hún sagðist elska mig en gæti bara ekki horft upp á mig lengur í því rugli sem ég var í. Þá lenti ég á botninum. Ég gat ekki lifað með því að missa konuna og börnin,“ sagði Hartson.

„Ég hef heyrt það frá fleirum að þeir þurfi að lenda harkalega á botninum áður en þeir byrja að sparka frá sér. Þarna var ég lentur á botninum.“

Hartson fór í meðferð árið 2011 og hefur tekist að feta beinu brautina síðan.

Han spilaði 400 leiki sem atvinnumaður. Á ferlinum spilaði hann meðal annars með Arsenal, Celtic og WBA. Hann spilaði þess utan 51 landsleik fyrir Wales og skoraði í þeim 14 mörk.