Fjöldi vinsælla vefsíðna mun mótmæla

Allnokkrar vinsælustu vefsíðna heims, sem Íslendingar nota margir hverjir daglega, munu koma almenningi spánskt fyrir sjónir á morgun. Ætla eigendur þeirra að breyta síðum sínum til að mótmæla stefnu Bandaríkjastjórnar um að afnema hlutleysi á internetinu.

Hlutleysi á internetinu er í grunninn sú stefna að internetþjónustuaðilar verði að gefa viðskiptavinum sínum jafnt aðgengi að öllum löglegum vefsíðum. Mega þeir því ekki hægja á aðgengi að ákveðnum síðum og krefja eigendur þeirra svo um háar fjárhæðir til að koma á óhindruðu aðgengi á ný.

Á meðal vefsíðna sem taka þátt í aðgerðunum eru Amazon, Reddit, Netflix, Twitter, Airbnb, Dropbox, Spotify og Pornhub en í heildina eru síðurnar 198 talsins.

Hinar tímabundnu breytingar á vefsíðunum felast í því að gefa notendum innsýn í hvernig netið gæti orðið ef af áformum Bandaríkjastjórnar verður. Munu eigendurnir því vísvitandi hægja á síðum sínum.

Þótt hlutleysi á netinu yrði einungis afnumið í Bandaríkjunum myndi slíkt hafa áhrif á netnotkun Íslendinga. Fyrirtæki sem starfrækja smærri vefsíður gætu farið á hausinn, meðal annars vegna minnkandi umferðar.