Hafið hefur étið óspart af Hliðsnesinu í vetur

„Fjörukamburinn er hreinlega kominn upp á veginn sem er farinn að skemmast á stórum kafla,“ segir Þór Saari, talsmaður íbúa allra sex húsanna á Hliðsnesi sem sent hafa ákall til bæjaryfirvalda og óskað eftir byggingu sjóvarnargarðs.

„Í vetur gekk sjór yfir túnið fyrir innan fjörukambinn og nær húsinu mínu heldur en nokkurn tíma áður. Sjávarstaðan endaði í rétt innan við tveggja metra fjarlægð frá húsinu mínu,“ segir Þór. Stysta leið að sjávarkambinum frá húsi hans er sjötíu metrar.

„Fyrir utan fjörukambinn neðan við túnið gengur maður tugi metra út í sjó á mó sem er bara gamla túnið,“ útskýrir Þór þá þróun sem er í gangi á Hliðsnesi. Í bréfi íbúanna kemur fram að eitt sinn hafi heilir sjö metrar horfið af sjávarkambinum á einni nóttu.

„Það gerðist í mjög slæmu veðri fyrir átta til tíu árum. Þetta gerist þegar það fer saman mjög há sjávarstaða og stormur úr suðvestri,“ segir Þór. Nú í vetur hafi sjór gengið yfir túnið fyrir innan fjörukambinn og nær húsinu hans heldur en nokkurn tíma áður.

Rakið er í bréfinu að nú sé svo komið að vegurinn hafi nokkrum sinnum lokast eða orðið illfær í vetur af völdum landburðar af grjóti og þangi. „Þegar það gerist hringjum við á gröfu og þá er mokað af honum,“ segir Þór. Fyrir nokkrum árum hafi verið gerður sjóvarnargarður að hluta en ekki kláraður alla leið. „Reglurnar hjá Siglingamálastofnun kveða á um að það sé ekki fyrr en hús eru komin í hættu að það eru gerðir sjóvarnargarðar.“

Að sögn Þórs hefur hann áður bent bæjaryfirvöldum á vandann og þau tekið vel í málið. Nú hafi íbúarnir loks látið verða af því að senda inn formlegt erindi.

„Ég var að ganga fjöruna um daginn þegar Birna týndist því manni fannst maður þurfa að gera eitthvað og þá tók ég eftir því hvað kamburinn hefur færst langt inn í vetur. Það hefur verið óvenju mikið um suðvestanáttir og óvenju stórstreymt,“ segir Þór Saari. 

Fréttin birtist fyrst í Fréttablaðinu.