Sænska rútufyrirtækið segir öllum reglum hafa verið fylgt

Strætófyrirtækið Bergkvarabuss segir ökumann rútunnar sem hafnaði utan vegar í Svíþjóð í dag, með þeim afleiðingum að þrjú börn létust, hafa fylgt öllum reglum er varða vinnutíma og hvíld.  Þá hafi hann ekki upplifað nein tæknileg vandamál. Þrjú börn létust í slysinu og fleiri eru alvarlega slösuð.

Þetta kemur fram á vef SVT en þar er haft eftir Simoni Sandberg, upplýsingafulltrúa rútufyrirtækisins, að rætt hafi verið við bílstjórann í dag, sem sé mjög brugðið eftir slysið.

„Hann segist að stórar holur hafi verið í veginum. Það sé samkvæmt honum ástæða þess að rútan fór útaf,“ segir Sandberg. „En við getum ekki staðfest þetta og við þurfum eins og aðrir að bíða eftir niðurstöðum rannsóknarinnar.“

Þá segir Sandberg að bílstjórar þurfi að fylgja ákveðnum reglum sem kveði á um að minnsta kosti 45 mínútna hvíldartíma eftir 4,5 klukkustunda akstur. Þessum reglum hafi ökumaðurinn fylgt.

„Við erum öll í áfalli yfir því sem gerðist, þetta er svo hræðilegur atburður. Við getum ekki gert annað en að hugsa til þeirra sem lentu í slysinu, til fjölskyldna þeirra og ættingja.“

Þjóðin lömuð af sorg

Fimmtíu og tvö börn ásamt sex kennurum og bílstjóra voru í rútunni. Börnin eru þrettán til fjórtán ára, í áttunda bekk í grunnskóla í Skene sem er lítill bær suður af Gautaborg þar sem 5.500 manns búa. Þau voru á leið til Klövsjö í skíðaferðalag og voru nær komin á áfangastað þegar slysið varð klukkan sjö í morgun að staðartíma.  

Þrír létu lífið, sex eru alvarlega slasaðir og af þeim tveir sem berjast nú fyrir lífi sínu. Í heildina voru um þrjátíu fluttir á sjúkrahús.

Í viðtali við sænska netmiðilinn Expressen segir faðir að dóttir hans hafi verið nýbúin að setja á sig öryggisbelti fyrir slysið og hann sé viss um að það hafi bjargað lífi hennar. Aftur á móti hafi vinir hennar sem ekki voru með öryggisbelti slasast alvarlega.

Nemendur og foreldrar söfnuðust saman í skóla barnanna í dag þar sem flaggað var í hálfa stöng og Stefan Löfven forsætisráðherra Svíþjóðar skrifaði á Facebook-síðu sína skömmu eftir slysið að þjóðin væri lömuð af sorg og hugur hans væri hjá þeim slösuðu, foreldrum og ástvinum.