Faldi LSD í nærbuxum sínum á leiðinni inn á Litla-Hraun

Karlmaður var fyrir helgi dæmdur í fjögurra mánaða fangelsi fyrir að reyna að smygla fíkniefnum inn á Litla-Hraun. Refsingin er bundin skilorði til tveggja ára.

Brot mannsins, sem hann játaði fyrir dómi, átti sér stað 1. ágúst á þessu ári. Maðurinn ætlaði að heimsækja fanga sem vistaður var í fangelsinu. Við skoðun fyrir heimsókn fundust í nærbuxum hans 298 einingar af LSD, 42 töflur sem innihéldu búprenorfín og 13 töflur sem innihéldu metýlfíndat.

Auk refsingarinnar var maðurinn, sem ekki hefur áður gerst brotlegur við lög, dæmdur til að sæta upptöku á efnunum og til að greiða allan sakar­kostnað. Hann nam 250 þúsund krónum.