„Frekar tíðindalítið veður í dag“

Veðurstofan gerir ráð fyrir suðvestlægri átt og dálítilli vætu Sunnan- og Vestanlands í dag en að það verði úrkomuminna á norðausturhorninu. Síðdegis munu skil skil fara yfir landið frá vestri til austurs og eykst þá úrkoman Vestanlands um tíma en skilin munu líklega ekki færa neina úrkomu að ráði á Norðaustur- og Austurland.

Um þessar vendingar hefur veðurfræðingur aðeins eitt að segja: „Það stefnir í frekar tíðindalítið veður í dag.“

Það snýst svo í norðlæga átt í kvöld og kólnar nokkuð hratt með henni, fyrst um landið Vestanvert. Það má búast við slydduéljum á Vestfjörðum fram eftir nóttu, en éljum norðaustan- og austantil á morgun.

Norðaustanáttin veðrur hvað hvössust á Suðaustur- og Austurlandi í fyrramálið þar sem þar sem hviður við fjöll geta auðveldlega farið yfir 30 m/s, einkum suður af Vatnajökli og á sunnanverðum Austfjörðum. Á sama tíma léttir til fyrir sunnan og vestan og eru ágætis líkur á björtu veðri þar á morgun. Það lægir síðan og styttir upp á landinu um og eftir hádegi.

„Tíðin er heldur rysjótt þessa dagana en annað kvöld er útlit fyrir vaxandi suðlæga átt og rigningu vestanlands eftir nokkuð fallegan og svalan dag á þeim slóðum,“ segir veðurfræðingur.

Veðurhorfur á landinu næstu daga

Á miðvikudag:

Norðan 8-13 m/s framan af degi, en 13-18 austast á landinu. Él um landið norðanvert, en bjartviðri sunnantil. Lægir og styttir upp síðdegis. Hiti 1 til 6 stig við S- og SV-ströndina, annars hiti um frostmark. Hægt vaxandi sunnanátt um kvöldið.

Á fimmtudag:

Suðvestan 8-15 m/s og rigning eða jafnvel slydda, einkum til fjalla, en úrkomulítið NA- og A-lands. Hiti 2 til 7 stig.

Á föstudag:

Gengur í norðaustan 8-15 m/s með éljum við norðurströndina. Hæg breytileg átt í öðrum landshlutum fram eftir degi og stöku skúrir eða slydduél. Hiti nálægt frostmarki.

Á laugardag:

Norðanátt og dálítil él N- og NA-til, en léttskýjað syðra. Hiti um eða undir frostmarki.

Á sunnudag:

Gengur í hvassa suðaustanátt með rigningu eða slyddu og hlýnandi veðri.

Á mánudag:

Útlit fyrir suðlæga átt, kólnandi veður og él S- og V-lands, annars úrkomulítið.