Innlent

Sveinn Hjörtur kveður líka Framsókn: Hunsa vilja fólks til að starfa saman

Sylvía Rut Sigfúsdóttir skrifar
Sveinn Hjörtur Guðfinnsson var aðalmaður Framsóknar og flugvallarvina í mannréttindaráði Reykjavíkurborgar
Sveinn Hjörtur Guðfinnsson var aðalmaður Framsóknar og flugvallarvina í mannréttindaráði Reykjavíkurborgar

Sveinn Hjörtur Guðfinnsson formaður Framsóknarfélags Reykjavíkur hefur ákveðið að segja sig úr Framsóknarflokknum og frá öllum trúnaðarstörfum fyrir flokkinn. Hann sendi frá sér fréttatilkynningu á fjölmiðla rétt í þessu en þar segir meðal annars.

„Ég trúi því að og geri mér grein fyrir því að samfélagsleg ábyrgð okkar allra er að bæta samfélagið og tryggja réttsýni og velferð. Við megum ekki gleyma uppruna okkar og reynslu. Við verðum að trúa því að við getum byggt samfélagið upp með sanngirni og staðfestu, með þori og kjark. Að því vil ég stefna.

Sveinn Hjörtur segir að hann hafi lengi stutt Sigmund Davíð Gunnlaugsson og hafi á margan hátt fengið að kenna á því að hafa trú á manni hugsjóna og lausna. Sigmundur Davíð tilkynnti í dag að hann hafi sagt skilið við Framsóknarflokkinn og vinni að stofnun nýs flokks fyrir komandi kosningar. 

Sveinn Hjörtur segist ekki hafa látið ítrekaðar hótanir á sig fá, frekar trúað því að réttlætið myndi sigra og um leið vonað að menn myndu sjá að sér. Því miður hafi það ekki gerst.

„Allt frá flokksþinginu 2016 hefur verið reynt að rétta út sáttarhönd til þess formanns sem nú situr. En engu hefur verið svarað og skipulögð vinna ýmissa aðila í Framsóknarflokknum er augljóslega ætluð til að ná völdum og hunsa vilja fólks til að starfa saman. Ákveðinn  kaupfélagsstjóri á norðurlandi er þar fremstur manna með ofurvald sitt sem hann stýrir með núverandi formanni flokksins Sigurði Inga. Auk þeirra eru aðrir sem tipla í takt við skipanir og fylgja lykt peninganna. Þetta er staðreynd um Framsóknarflokkinn í dag því miður. Nokkrir "eigendur" hans virða ekki siðferðilegar reglur samfélagsins. Þetta veit hinn almenni flokksmaður ekki um.“

Hér fyrir neðan má lesa fréttatilkynningu hans í heild sinni. 
 

Ég hef ákveðið að kveðja Framsóknarflokkinn

Þátttaka mín í Framsóknarflokknum hófst ansi snemma. Flokkurinn hefur fylgt mér lengi og ég hef sinnt ýmsum trúnaðarstörfum fyrir flokkinn, nú síðast sem formaður Framsóknarfélags Reykjavíkur í tæp tvö ár. Ég hef alltaf haft trú á því að hægt sé að bæta samfélag okkar og því ákvað ég að gera mitt besta til að láta gott af mér leiða.

Í nútíma samfélagi eru stjórnmál vettvangur lausna, eða á að vera svo. Í lífi mínu finn ég að við þurfum þess - aldrei eins mikið og nú - að breyta samfélaginu. Ríkt af tækifærum sem eiga að hlotnast öllum. En það er ekki svo, og því hóf ég þátttöku mína í stjórnmálum. Ég ákvað að taka þátt í því að breyta, fara í verkið og gera mitt allra besta til að bæta samfélag okkar því það er eitt af megin verkefni stjórnmála og grunnstef. 

Ég hef einnig kynnst ótrúlegustu vinnubrögðum sem túlkast undir stjórnmál, en er frekar líkara algjöru ofvaldi og græðgi. Dökk mynd manneskjunnar sem lætur eigin hagsmuni sér ofar og leitar allra leiða til niðurrifs og hótanna. Í því ati, og í ábyrgð minni sem formaður Framsóknarfélags Reykjavíkur hef ég orðið vitni að því að lýðræðislegar reglur og vinnubrögð eru ekki virtar, siðareglur brotnar. Ég hef orðið fyrir persónulegum hótunum í minn garð, og fengið minn skerf af duldun hótunum frammámanna og trúnaðarmanna flokksins. Menn hafa leyft sér að hóta með ýmsum hætti, sem ég tel ekki rétt að fara nánar út í á þessum tímapunkti. 

Ég hef ekki látið ítrekaðar hótanir á mig fá, frekar trúað því að réttlætið sigri og um leið vonað að menn hreinlega sjái að sér. Því miður hefur það ekki gerst. Allt frá flokksþinginu 2016 hefur verið reynt að rétta út sáttarhönd til þess formanns sem nú situr. En engu hefur verið svarað og skipulögð vinna ýmissa aðila í Framsóknarflokknum er augljóslega ætluð til að ná völdum og hunsa vilja fólks til að starfa saman. Ákveðinn  kaupfélagsstjóri á norðurlandi er þar fremstur manna með ofurvald sitt sem hann stýrir með núverandi formanni flokksins Sigurði Inga. Auk þeirra eru aðrir sem tipla í takt við skipanir og fylgja lykt peninganna. Þetta er staðreynd um Framsóknarflokkinn í dag því miður. Nokkrir "eigendur" hans virða ekki siðferðilegar reglur samfélagsins. Þetta veit hinn almenni flokksmaður ekki um. 

Ég hef lengi stutt Sigmund Davíð Gunnlaugsson og hef á margan hátt fengið að kenna á því að hafa trú á manni hugsjóna og lausna. Ég hef einnig kynnst góðu fólki í Framsóknarflokknum sem hefur með ósérhlífni unnið að góðum málum og haft trú á því sem það gerir. Fólki sem eru sannir í verkum og þátttöku flokksins. 

En í dag hef ég ákveðið að segja mig úr Framsóknarflokknum og frá öllum þeim trúnaðarstörfum sem mér voru falin. Ég þakka fyrir það traust sem mér var falið og þá vinnu sem ég átti með góðu fólki flokksins. Ég trúi því að og geri mér grein fyrir því að samfélagsleg ábyrgð okkar allra er að bæta samfélagið og tryggja réttsýni og velferð. Við megum ekki gleyma uppruna okkar og reynslu. Við verðum að trúa því að við getum byggt samfélagið upp með sanngirni og staðfestu, með þori og kjark. Að því vil ég stefna!

Sveinn Hjörtur Guðfinnsson


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.