Fréttin hefur verið uppfærð.

Sigmundur Davíð Gunnlaugsson, fyrrverandi forsætisráðherra, gengur til liðs við Samvinnuflokkinn fyrir komandi kosningar samkvæmt heimildum fréttastofu. Ekki hefur náðst í Sigmund í dag til að fá þetta staðfest.

Eins og Vísir greindi frá fyrr í dag hefur Sigmundur ákveðið að segja skilið við Framsóknarflokkinn og sendi hann frá sér ítarlegt bréf til flokksmanna Framsóknar í dag. Þar fór hann ítarlega yfir níu ára feril sinn innan flokksins og þykir honum mjög hafa verið að sér vegið undanfarið eitt og hálft ár eða svo.

Björn Ingi ætlar ekki fram

Fjölmiðlamaðurinn Björn Ingi Hrafnsson er skráður rétthafi lénsins samvinnuflokkurinn.is en segist ekki vera á leið í framboð.

„Ég er ekki sjálfur á leið í framboð. Ég vildi bara taka þátt í að búa til nýtt borgaralegt afl þar sem jöfnuður, réttlæti og framfarir leika lykilhlutverk. Ég er viss um að á næstunni muni öflugir aðilar ganga til liðs við okkur og stofna þennan flokk með formlegum hætti og veita honum forystu. Ég sé fyrir mér að þeir komi úr ýmsum áttum, líka fólk sem hefur hingað til ekki látið að sér kveða á hinu pólitíska sviði,“ sagði Björn Ingi í samtali við fréttastofu í gær.

Í bréfi sínu segir segir Sigmundur Davíð að vinnubrögð Framsóknarflokksins séu honum þvert um geð og að alls hafi í hans formannstíð verið gerðar sex tilraun til að fella hann af formannsstól. Hann hafi því staðið frammi fyrir tveimur valkostum þegar í ljós kom að boðað yrði til kosninga í lok október, að láta sig hafa vinnubrögð flokksins eða stofna nýtt framboð.

„Hann er sá að vinna að myndun nýs stjórnmálaafls með fólki sem er reiðubúið að starfa á sömu forsendum og við leituðumst við að gera frá 2009 til 2016. Bjóða upp á valkost sem svarar kalli tímans og bregst við upplausnarástandi stjórnmálanna með skynsemishyggju og réttlæti að leiðarljósi. Vinna með traustu og heiðarlegu fólki að því að mynda flokk sem hefur þolgæði og kraft til að standa vörð um það sem er sanngjarnt og rétt, líka þegar það er erfitt. Flokk sem getur veitt stöðugleika og staðið vörð um hefðbundin grunngildi en er um leið flokkur hugmyndaauðgi og framfara. Flokk sem leitar til þeirra sem best þekkja til á hverju sviði og styður góðar hugmyndir sama hvaðan þær koma,“ skrifar Sigmundur.