Innlent

Leggja fram frumvarp um ríkisborgararétt til handa Mary og Haniye

Margrét Helga Erlingsdóttir skrifar
Logi Már Einarsson, formaður Samfylkingarinnar, er vongóður um að frumvarpið nái fram að ganga.
Logi Már Einarsson, formaður Samfylkingarinnar, er vongóður um að frumvarpið nái fram að ganga. Vísir/Stefán

Logi Einarsson, formaður Samfylkingarinnar, tilkynnti í dag að flokkurinn hyggst leggja fram frumvarp um íslenskan ríkisborgararétt til handa stúlkunum Haniye, Mary og fjölskyldum þeirra. Fjölmenn mótmæli fóru fram á Austurvelli í gær þar sem fólk lýsti yfir óánægju sinni með brottvísanirnar. Sjá frétt Vísis um mótmælin hér.

Í samtali við Vísi er Logi spurður hvað nákvæmlega felist í frumvarpinu. Felst aukinn réttur flóttabarna í því? 

„Í þessu einstaka frumvarpi felst ríkisborgararéttur til handa þessum tveimur stúlkum og foreldrum þeirra en í greinargerðinni segjum við að inntak frumvarpsins, þó það lúti að þessum tveimur börnum og foreldrum, sé ekki síst að senda stjórnvöldum mjög skýr skilaboð að löggjafinn ætlist til þess að réttindi barna séu virt í hvívetna við töku stjórnvaldsákvarðana þar sem hagsmunir þeirra eru í húfi.“

Logi segir að það hafi skapast gleðileg stund á Alþingi á vormánuðum 2013 þegar þingmenn greiddu samhljóða atkvæði um löggildingu Laga um samnings Sameinuðu þjóðanna um réttindi barnsins.

Þær Haniye og Mary hafa báðar verið á flótta allt sitt líf. Foreldrar þeirra sóttu um hæli fyrir þær á landi en umsóknunum var hafnað af yfirvöldum. Þær verða því brátt sendar úr landi.

„Það var skýr vilji löggjafans að það yrði hugsað og horft sérstaklega til hagsmuna barna og það væri í rauninni tekið tillit til þeirra sjónarmiða og að þau fengju að tjá sig þegar þau ættu í hlut en ekki bara horft á stöðu foreldra. Það má segja að þó málið snúi einvörðungu að veitingu ríkisborgararéttar til þessa aðila þá er í greinargerðinni hnykkt á því að það sé ætlast til þess að héðan í frá fari stjórnvöld eftir því sem Alþingi vill.“

Logi bendir á að þrátt fyrir að stjórnvöld hafi heimild til að gera ýmislegt sé ekkert sem segi að þau þurfi alltaf að nýta sér það og vísar þannig til Dyflinnarreglugerðarinnar.

Logi segist ekki hafa trúað því þegar hann frétti fyrst af því að stúlkunum yrði vísað úr landi. „Mér finnst hryggilegt að þetta ríka land skuli ekki standa betur að þessum málum og horfa sérstaklega til barna í hörmulegri stöðu,“ Segir Logi.

Ertu vongóður um að frumvarpið nái fram að ganga?  

„Ég er miklu meira en vongóður ég bara trúi ekki öðru. Ég er algerlega sannfærður um það að meirihluti þingheims er sammála okkur,“ segir Logi sem bætir við að málið sé fyrst og fremst mannúðarmál og yfirlýsing um að Alþingi hafi það afl að fylgja eftir þeim ákvörðunum sem það tekur.

Samfylkingin, með Loga í broddi fylkingar, hefur sent tillöguna til lokayfirferðar á nefndarsvið sem og á alla þingmenn og ráðherra og óskað eftir meðflutningi. Þá er þess einnig óskað að svör berist fyrir lok vinnudags á morgun.

Hér að neðan er hægt að lesa stöðuuppfærslu Loga í heild.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.