Íslenskt hagkerfi er tæknilega séð í lægð

Íslenska hagkerfið er tæknilega séð í lægð í fyrsta sinn frá árinu 2012. Þetta má lesa úr gögnum Hagstofu Íslands um landsframleiðslu. Hagfræðiprófessor segir að vissulega hafi dregið talsvert úr vexti hérlendis, en litlar líkur séu þó á stórri niðursveiflu í bráð.

Í frétt Sky News sem birt var í dag segir Bjarni Benediktsson forsætisráðherra það óhjákvæmilegt að önnur bankakreppa muni skella á fyrr eða síðar, þó ekki sé ljóst hvenær það verði. Aftur á móti þurfi stjórnvöld að vera undir það búin og gæta þess að þeir sem tekið hafi áhætturnar beri afleiðingarnar, en ekki almennir skattborgarar.

Sjá einnig: Bjarni segir að græðgin muni leiða til annarrar kreppu

Í frétt Financial Times frá síðustu helgi er því lýst hvernig árstíðaleiðrétt landsframleiðsla á Íslandi hefur dregist saman á síðustu tveimur ársfjórðungum, en á fræðimáli er talað um efnahagslægð þegar svo stendur á. Friðrik Már Baldursson, prófessor í hagfræði við Háskólann í Reykjavík telur þó ekki um hættumerki að ræða. Þvert á móti hafi verið tímabært að hér hægði á vextinum, enda geti ríki að jafnaði ekki borið svo mikinn hagvöxt sem hér hefur verið undanfarið til lengdar.

Friðrik segir þróunina því í raun vera af því góða, svo lengi sem ekki komi til eiginlegs samdráttar. Hann segir hins vegar að fátt í umhverfinu hérlendis bendi til þess að til samdráttar komi á næstunni. Aftur á móti sé það ávallt talsvert háð utanaðkomandi þáttum. Þannig sé kínverskt bankakerfi t.a.m. orðið mjög útþanið og séu helstu hættumerkin því á lofti á þeim slóðum. Efnahagskreppa í Kína myndi síðan eðli málsins samkvæmt hafa alþjóðlegar afleiðingar sem óhjákvæmilega næðu til Íslands.