Juholt afhendir trúnaðarbréf: Kom til landsins með Norrænu

Håkan Juholt, fyrrverandi formaður sænskra Jafnaðarmannaflokksins, afhenti Guðna Th. Jóhannessyni trúnaðarbréf sitt í gær en hann hefur tekið til starfa sem sendiherra Svíþjóðar á Íslandi.

Í frétt á vef forsetaembættisins segir að á fundinum hafi verið rætt um farsæl samskipti ríkjanna til margra ára og möguleika á auknum viðskiptum. Sömuleiðis var rætt um samvinnu á sviði menningar, mennta og listar. Þá var efnt til móttöku, sendiherranum til heiðurs.

Juholt kom til landsins á þriðjudaginn í síðustu viku en hann kom til landsins með Norrænu.

Í viðtali við Östra Småland Nyheterna frá í síðustu viku segir hann það hafa verið magnaða stund að stíga niður fæti á Seyðisfirði og að hann finni fyrir mikilli auðmýkt nú þegar hann stígur sín fyrstu skref í stöðu sendiherra.

Vill skilja Íslendinga

Aðspurður um ástæður þess að hann og Åsa, eiginkona hans, hafi ákveðið að sigla til Íslands í stað þess að fljúga segir hann að þau hafi viljað öðlast meiri skilning á þeim aðstæðum sem Íslendingar búi við. „Þess vegna kusum við að taka bátinn. Ég vil skilja fjarlægðirna – og hafið, sem er sá raunveruleiki sem Íslendingar búa við. Þeir hafa lifað á fiski og allir þekkja einhvern sem hafa farist í sjóslysum.“

Juholt segist ekki hafa lært mikla íslensku enn sem komið er, einungis nokkur orðatiltæki. Hann segir markmið sitt í stöðu sendiherra vera að fá fleiri íslensk ungmenni til halda til náms í Svíþjóð og lokka fleiri íslenska ferðamenn til Svíþjóðar. Þá vonast hann til að vekja áhuga Íslendinga á sænskum timburhúsum.

Langur þingferill

Juholt tekur við stöðu sendiherra af Bosse Hedberg sem lét nýverið af störfum eftir um fjögurra ára starf. Juholt gegndi formennsku í sænska Jafnaðarmannaflokknum í tæpa tíu mánuði, frá mars 2011 til janúar 2012. Hann lét af þingmennsku síðasta haust eftir að hafa átt þar sæti í 22 ár.