Hótelgisting hælisleitenda úr 205 þúsundum í 176 milljónir

Kostnaður Útlendingastofnunar vegna leigu á hótel- og gistiheimilaherbergjum fyrir umsækjendur um alþjóðlega vernd fór úr rúmlega 200 þúsund krónum árið 2014 í 176 milljónir árið 2016. Þessi leiga fór ekki í útboð þar sem ófyrirséð sprenging varð í fjölda umsókna um alþjóðlega vernd í fyrrahaust. Gisting hefur verið keypt eftir þörfum hverju sinni.

Kostnaðurinn vegna þessa kom fram í svari Sigríðar Á. Andersen dómsmálaráðherra við fyrirspurn Ástu Guðrúnar Helgadóttur, þingmanns Pírata, sem birt var á vef Alþingis í síðustu viku.

Þar segir að frá ársbyrjun 2017 hafi verið haldin skrá yfir fjölda herbergja sem tekin hafa verið á leigu fyrir umsækjendur um alþjóðlega vernd en ekki er til yfirlit um fjölda herbergja fyrir þann tíma. Árlegur heildarkostnaður vegna leigu á herbergjum á hótelum og gistiheimilum án útboðs var 205.590 kr. árið 2014 en jókst síðan gríðarlega árið 2015 og nam þá 28.090.095 kr. Það var þó ekkert miðað við árið í fyrra þegar kostnaðurinn nam 176.098.930 kr.

Fram kemur í svarinu að leiguverð á stöku herbergi sé mjög mismunandi eftir stærð, staðsetningu og veittri þjónustu en sé á bilinu 8 til 15 þúsund krónur fyrir hverja nótt.

Þórhildur Hagalín, upplýsingafulltrúi Útlendingastofnunar, segir að aukinn kostnað í fyrra megi fyrst og fremst rekja til fordæmalausrar fjölgunar í umsóknum hælisleitenda á haustmánuðum ársins 2016.

„Þetta var það mikil ófyrirséð aukning á mjög skömmum tíma að það var ekki ráðrúm til að bjóða nokkuð út í þessum efnum.“

Samkvæmt fjárlagafrumvarpi ársins 2018, sem lagt var fram í vikunni, er áætlað að kostnaður vegna fjölgunar umsókna um hæli hér á landi muni nema 2,2 milljörðum króna umfram fjárheimildir. Kostnaður vegna málefna hælisleitenda felst annars vegar í þjónustu við hælisleitendur og uppihald, og hins vegar í málsmeðferð umsókna um alþjóðlega vernd.

Rekstrarframlög til útlendingamála hækka um ríflega 1,5 milljarða króna til að mæta auknum kostnaði vegna fjölgunar hælisleitenda.