Tuttugu Stjörnumörk í tveimur Evrópuleikum | Nýtt íslenskt met í dag

Stjörnukonur buðu upp á aðra markaveisluna í röð í forkeppni Meistaradeildar Evrópu í Króatíu í dag þegar Garðabæjarliðið vann 11-0 sigur á ZFK Istanov frá Makedóníu.

Þetta er stærsti sigur íslensk liðs í Evrópukeppni frá upphafi en gamla metið fyrir Evrópukeppnina í ár var 9-0 sigur Valskvenna á ísraelska liðinu Maccabi Holon árið 2008. Stjarnan jafnaði metið í fyrsta leiknum í riðlinum og bætti það síðan í kvöld.

Þetta er líka í fyrsta sinn sem íslenskt lið skorar meira en tíu mörk í einum og sama Evrópuleiknum.

Stjarnan vann 9-0 sigur á færeyska liðinu frá Klaksvík í fyrsta leik sínum í riðlinum og hefur þar með skoraði tuttugu mörk í fyrstu tveimur leikjum sínum.

Síðasti leikurinn á móti heimastúlkum í Osijek verður hreinn úrslitaleikur um sæti í 32 liða úrslitum Meistaradeildarinnar.

Guðmunda Brynja Óladóttir skoraði tvö mörk í leiknum í dag auk þess að gefa 2 stoðsendingar og er þar með búin að skora fjögur mörk og gefa þrjár stoðsendingar í fyrstu tveimur Evrópuleikjum sínum á ferlinum. Hún lék með Selfossi þegar Stjarnan komst síðast í Evrópukeppni.

Donna Key Henry skoraði þrennu á fyrstu átta mínútum seinni hálfleiksins en hún er þar með komin með fimm mörk samanlagt í þessum tveimur leikjum.

Katrín Ásbjörnsdóttir skoraði þrennu í dag og er því með fjögur mörk samanlagt. Þessar þrjár hafa því allar skorað meira en tvö mörk að meðaltali í leik í þessum tveimur leikjum.

Fyrsta mark Stjörnuliðsins í dag skoraði Lorina White en svo tóku þær Katrín, Guðmunda og Donna við.

Ana Victoria Cate fékk tækifæri til að skora tíunda markið en lét verja frá sér vítaspyrnu á 86. mínútu.  Það kom hinsvegar tveimur mínútum síðar en markaskorararinn var Viktoría Valdís Guðrúnardóttir.

Ellefta og síðasta markið var síðan sjálfsmark eins leikmanns Istanov.

Stjarnan - ZFK Istanov 11-0 (5-0)

1-0 Lorina White (18.)

2-0 Katrín Ásbjörnsdóttir (31.)

3-0 Guðmunda Brynja Óladóttir (43.)

4-0 Katrín Ásbjörnsdóttir (43.)

5-0 Guðmunda Brynja Óladóttir (45.+3)

6-0 Donna Key Henry (47.)

7-0 Donna Key Henry (51.)

8-0 Donna Key Henry (53.)

9-0 Katrín Ásbjörnsdóttir (62.)

10-0 Viktoría Valdís Guðrúnardóttir (88.)

11-0 Sjálfsmark (90.+1)