Federer kallar á breytingar

SVisslendingurinn Roger Federer kallar eftir breytingum í reglum risamóta í tennis. 

Federer komst áfram í aðra umferð Wimledon-mótsins í gær eftir að andstæðingur hans þurfti að hætta leik eftir rúmar 40 mínútur. Sömu sögu var að segja um viðureign Serbans Novak Djokovic sem var fyrr um daginn. 

Þessar tvær viðureignir fóru fram á aðal velli mótsins og borguðu aðdáendur tæpar átta þúsund krónur fyrir að sjá tvo af bestu mönnum heims spila. Dagskrá sem hefði átt að bjóða upp á hágæða tennis í fjóra, fimm tíma lauk eftir 80 mínútur. 

Á blaðamannafundi eftir leikinn benti Federer á að alþjóðatennissambandið sé að þróa nýja reglugerð sem gæti komið í veg fyrir álíka vonbrigði í framtíðinni. Alþjóðatennissambandið heldur öll tennismót, fyrir utan risamótin fjögur. Þessar breytingar fela það í sér að í stað þess að tennisleikari þurfi að hefja leik til þess að fá verðlaunaféð fyrir viðureignina, þá geti sá hinn sami afboðað sig vegna meiðsla og samt fengið verðlaunaféð. Þá sé plássi hans í viðureigninni úthlutað til næsta manns inn á mótið og viðureignin getur verið leikin til fulls. 

„Ég vorkenni áhorfendunum. Þeir komu hingað til að horfa á gott tennis, alvöru viðureign. Leikmaður á ekki að labba inn á völlinn ef hann veit að hann mun ekki geta klárað,“ sagði Federer. 

„Spurningin er hvort þeir hafi virkilega trúað því að þeir gætu klárað? Ef þeir gerðu það er ekkert að því að þeir hafi þurft að hætta. Annars hefðu þeir átt að gefa upp plássið sitt“

Verðlaunaféð fyrir að detta út í fyrstu umferð Wimledon-mótsins er 35 þúsund pund, eða rúmar fjórar og hálf milljón, svo að eins og reglurnar eru í dag þá furðar engan að leikmenn skuli vilja byrja sínar viðureignir þó þeir séu ekki í fullkomnu ástandi.

Alþjóðatennissambandið hefur haft nýju regluna í gildi í nokkrum mótum það sem af er árs og hefur hún skilað sér í mun færri viðureignum sem enda ókláraðar því annar leikmaðurinn þarf að hætta leik.

Heimildarmenn breska blaðsins Telegraph hjá Wimbledon sögðu að forráðamenn mótsins hefðu verið að fylgjast náið með þróuninni hjá alþjóðatennissambandinu, en ekki viljað efna til breytinga þar sem öll risamótin fjögur vilji vera sameinuð í öllum sínum aðgerðum og ekki sé samhljómur um breytingar eins og komið er. 

Andstæðingar nýju reglurnar telja það siðferðislega rangt að borga leikmanni sem keppir ekki á mótinu. Þeir leggja til að í staðinn sé hægt að veita þeim sárabætur sem þurfa að draga sig úr keppni vegna meiðsla í stað þess að borga þeim verðlaunaféð. 

Eftir tvo keppnisdaga á Wimbledon hafa átta manns dregið sig úr keppni nú þegar.