Viðgerð á nýjum sæstreng kostar yfir hálfan milljarð

Viðgerð á fjögurra ára gömlum sæstreng milli lands og Eyja er talin kosta yfir hálfan milljarð króna. Eitt af stærstu kapalskipum heims var fengið til verksins, sem þykir óvenju flókið, en vonast er til að viðgerð ljúki um helgina. Í fréttum Stöðvar 2 var rætt við Nils Gústavsson, framkvæmdastjóra hjá Landsneti. 

Bilunin varð í byrjun aprílmánaðar í aðalrafstrengnum milli lands og Eyja og var hún staðsett á fimmtíu metra dýpi norðvestan Elliðaeyjar. Þar hefur kapalskipið Isaac Newton unnið að viðgerð undanfarna tíu daga. 

„Að gera við svona sæstreng er mjög flókið, - eiginlega flóknara heldur en að leggja sæstreng,“ segir Nils.

Klipptur var 50 metra bútur af strengnum á kaflanum þar sem bilunin er. Síðan er splæst við nýjum 250 metra löngum bút en þessi aukna lengd skýrist af því að samsetningin fer fram í skipinu á yfirborði. Nils áætlar að kostnaður fari yfir 500 milljónir króna. 

Ekki er vitað hvað olli biluninni en ólíklegt þykir að veiðarfæri hafi farið í hann þar sem hann var ekki  slitinn og engar skemmdir hafa sést á ytra borði strengsins. Athygli vekur að hann er aðeins fjögurra ára gamall, lagður árið 2013, en strengurinn var komin úr ábyrgð og því óvíst hvort tjónið fáist bætt. 

„Við eigum hins vegar eftir að fara yfir hvers eðlis bilunin er og hvort þetta sé einhver framleiðslugalli eða annað,” segir Nils og viðurkennir að mjög þungt sé að fá þennan kostnað í hausinn. 

Sæstrengur sem lagður var árið 1978 var orðinn ónýtur og hafa Eyjamenn undanfarna tvo mánuði þurft að treysta á sæstreng frá árinu 1962. Flutningsgeta hans er takmörkuð, 7-8 megavött, sem rétt dugar fyrir almenna notendur í Eyjum. 

Það þykir lán í óláni að ekki stóð yfir vertíð, sem kallar á mikla raforkunotkun, og veturinn yfirstaðinn en erfitt er að gera við sæstreng nema veður og sjólag séu stillt. 

En miðað við hversu flókið og tafsamt er að gera við stuttan Vestmannaeyjastreng, það gætu vart talist meðmæli með sæstreng milli Íslands og Bretlandseyja? 

„Auðvitað er þetta alltaf áhætta með þessa sæstrengi og sérstaklega svona viðgerð úti á hafi er mjög dýr, það er alveg ljóst,” segir Nils.