Banki greiði bætur vegna myntláns

Nordea-bankinn hefur í undirrétti í Noregi verið dæmdur til að greiða hjónum bætur vegna milljónatjóns sem þau urðu fyrir. Þau höfðu tekið lán í erlendri mynt þegar þau keyptu sér sumarhús í Frakklandi. Það er mat dómstólsins að bankinn hefði átt að ráða hjónunum frá því að taka slíkt lán.

Hjónin tóku lán í svissneskum frönkum fyrir 2,5 milljónir norskra króna árið 2008. Upphæðin var komin í yfir 4,1 milljón á nokkrum árum. Bankinn var dæmdur til að greiða hjónunum 1,5 milljónir norskra króna eða næstum jafnháa upphæð og tapið hljóðaði upp á.