„Þjóðfélag sem sinnir ekki börnunum sínum er ekki gott þjóðfélag“

Bergur Þór Ingólfsson, leikstjóri Bláa hnattarins og faðir Nínu Rúnar Bergsdóttur, eins brotaþola í máli Roberts Downey, telur að við þurfum nýja stjórnarskrá og umbætur í kerfinu. Þetta sagði hann þegar hann tók við Grímuverðlaunum fyrir barnasýningu ársins, Bláa hnöttinn.

Robert Downey missti lögmannsréttindi eftir að hafa hlotið dóm fyrir að hafa beitt fjórar stúlkur kynferðisofbeldi. Úrskurður Hæstaréttar um að veita Roberti uppreist æru hefur hlotið mikla gagnrýni og beinir Bergur spjótum sínum að meðferð þessa máls í þakkarræðu sinni.

„Ef við stöndum frammi fyrir röngum lögum og röngum gjörðum þá breytum við því. Við fáum nýja stjórnarskrá svo forsetinn þurfi ekki að skrifa undir lög sem hann sér ekki einu sinni.“

Þetta sagði Bergur sem vísar þarna í málflutning Guðna Th Jóhannesson, forseta Íslands, sem sagðist í samtali við Stöð 2 vera ábyrgðarlaus af stjórnarathöfnum sem forseti:

„Þann 16. september í fyrra fékk ég fjórar svona beiðnir. Ég fæ engan rökstuðning, engin fylgigögn, einungis nafn og lengd dóms.”

Auk þess að nefna mál þetta gerði Bergur Þór börn að umfjöllunarefni sínu sem er einkar viðeigandi þar sem hann tók við verðlaunum fyrir barnaleikrit ársins eins og áður sagði.

„Við þurfum að sinna börnunum okkar. Þjóðfélag sem sinnir ekki börnunum sínum er ekki gott þjóðfélag. Það er ekki göfugt þjóðfélag. Ef við ætlum að vera fallegt þjóðfélag þá sinnum við börnunum fyrst og þeim sem minnst mega sín.“

Grímuverðlaunin voru haldin í gær við hátíðlega athöfn í Þjóðleikhúsinu. Hátíðin var í beinni útsendingu á Ríkisútvarpinu.