Allir ofurspenntir fyrir nýjasta tölublaði HA

Í seinustu viku var vorútgáfu tímaritsins HA fagnað í Hönnunarmiðstöð Íslands. Fullt var út úr dyrum og glatt á hjalla enda fólk búið að bíða spennt eftir þessu nýjasta tölublaði.

„Blaðið er ekki bara fagurt á að líta heldur líka vandað, fræðandi og skemmtilegt en það var mál manna að þetta væri flottasta útgáfan til þessa.“

„Fyndnast var þó að fylgjast með grafísku hönnuðunum sem struku og þefuðu af blaðinu á nánast pervertískan hátt,“ segir Ólöf Rut Stefánsdóttir, verkefnastjóri hjá Hönnunarmiðstöð Íslands.

Ólöf segir mikið stuð hafa verið í opnunarhófinu í seinustu viku. „Það er alltaf mikill fögnuður að koma HA blaðinu út, því var mikil gleði í loftinu enda gífurleg vinna sem býr að baki útgáfunnar.“

„Til gamans má nefna að túristar klæddir gore-tex frá toppi til táar römbuðu inn í partíið í leit að upplýsingamiðstöð ferðamanna, sáu blaðið, keyptu það og spurðu svo eftir á hvað þetta væri nú eiginlega. Má þar af leiðandi álykta að forsíðan hafi verið það aðlaðandi að þau hafi hugsað bara: „shut up and take my money!“,“ segir Ólöf að lokum.

.