Ræktar tíu tegundir spíra

Mér þótti mjög vænt um þessa viðurkenningu. Hún er vissulega hvatning til að halda áfram á sömu braut,“ segir Katrín H. Árnason, viðskipta- og umhverfisfræðingur, um hvatningarverðlaun garðyrkjunnar sem Kristján Þór Júlíusson afhenti henni á sumardaginn fyrsta fyrir hönd Landbúnaðarháskólans.

Katrín stofnaði fyrirtækið Ecospíru árið 2012. Það er eina fyrirtækið sem ræktar lífrænar spírur á markað á Íslandi í dag. „Við framleiðum vikulega um tíu mismunandi tegundir spíra,“ upplýsir hún og nefnir meðal annars brokkólí-, blaðlauks-, hvítlauks og baunaspírur, auk sólblóma- og baunagrasa og ýmissa tegunda smájurta.

En hvernig hefur gengið að kenna Íslendingum að meta spírur? „Það hefur gengið vonum framar. Meðal annars hafa matreiðslumenn mötuneyta verið tryggir viðskiptavinir og hafa boðið upp á spírur daglega í mötuneytum sínum.+ Eins hefur Áslaug Snorradóttir, matarhönnuður og ljósmyndari, átt ríkulegan þátt í að finna spírum farveg með alls konar mat og með því að fanga þær á mynd, hér má ég til með að nefna súkkulaðisleikjó með blaðlauksspírum sem er bara ótrúlega góður!

Svo eru Íslendingar opnir fyrir nýjungum og meðvitaðir um heilsuna, ég tel það hafa hjálpað mikið.“

Spíruræktunina kveðst Katrín hafa lært í Bandaríkjunum og Svíþjóð. Hún er með þrjá starfsmenn í framleiðslunni, auk hennar sjálfrar. „Ég hef verið í meira en fullri vinnu við að byggja upp fyrirtækið síðustu fimm ár og sé ekki að það sé að breytast í bráð.

En Ecospíra er sjálfbær í dag og á góðri siglingu. Ég sé mikla möguleika í vöruþróun, meðal annars með þurrkun spíraðra fræja og korns og tel spennandi tíma fram undan.“

Spurð hvort alltaf sé gaman í vinnunni kemur smá hik á Katrínu. „Ég neita því ekki að þetta hefur ekki bara verið gleði og gaman. Nýsköpun kostar líka svita og tár en skapandi þátturinn hefur mér þótt skemmtilegastur. Svo eru engir tveir vinnudagar eins.“