Eigandi La Luna hellir sér yfir ósáttan viðskiptavin og hótar að láta reka hann

Viðbrögð Þorleifs Jónssonar, eiganda pizzustaðarins La Luna á Grensásvegi, við kvörtun ósátts viðskiptavinar hafa vakið mikla athygli í netheimum síðustu daga. Hann segist ætla að líta við á vinnustað viðskiptavinarins eftir helgi og koma því um kring að hann verði rekinn enda viti hann að „vinnuveitendur hans líta svona nettröll hornauga.“

Í kjölfar samskiptanna hafa netverjar lýst því yfir að viðskiptum þeirra verði beint annað á næstunni enda ekki í fyrsta sinn sem hatrömm viðbrögð Þorleifs rata í fréttirnar.

Viðskiptavinurinn, Heiðar Aðaldal Jónsson, ritaði kvörtunina á Facebook-síðu La Luna á fimmtudag en þar lýsir hann reynslu sinni af þjónustunni á staðnum. Hana má sjá hér að neðan.

Heiðar segist hafa pantað 2 pizzur og fengið vilyrði fyrir því að hægt væri að skipta annarri pizzunni í tvennt án endurgjalds sem svo hafi ekki verið raunin þegar uppi var staðið.

„Þannig í staðinn fyrir 3.990 borgaði èg 4.640 minnir mig,“ segir Heiðar og lýkur kvörtun sinni til La Luna á orðunum „Fer ekki eða panta ekki aftur þaðan.“

Þorleifur, betur þekktur sem Tolli eða Pizzuhvíslarinn, hefur ýmislegt út á þessa kvörtun að setja í athugasemdakerfinu við færsluna.

Sjá einnig: Þeir kalla mig pítsahvíslarann

Þar segir hann að kvörtunin sé ósanngjörn og komi um tveimur vikum eftir að Heiðar pantaði pizzurnar. „Ef eitthvað lyktar þá er það þessi ömurlega gagnrýni þín löngu eftir að þú keyptir þær og ást væntanlega með mikilli ánægju,“ segir Tolli og þegar Heiðar svarar honum bregst hann ókvæða við.

„Ekki rífa kjaft og ljúga upp á fólk ef þú ert ekki tilbúinn að fólk svari fyrir sig og þú munt aldrei versla hér framar,“ segir Tolli og bætir við að Heiðar hafi verið „merktur“ á staðnum í ljósi þess að hann sé alræmdur lygalaupur að sögn Tolla.

„Þú ert frægur á síðum veitingastaða fyrir svona dylgjur og lygar, þér hefur bara verið svarað í fyrsta sinn, væntanlega lætur þú okkur og aðra staði í friði hér eftir. Svona bitrir guttar eins og þú eiga litið líf og þessar barnalegu komment þín væntanlega hætta núna,“ segir Tolli og bætir um betur.

„Þú ert hræðilegt eintak af mannveru, ég vorkenni fjölskyldu þinni og börnum ef þú átt einhver, væntanlega logið því líka.“

Þegar hér er komið við sögu hafa aðrir skorist í leikinn - flestir á einu máli um að tilsvör Tolla séu með hvassara móti. Það fór öfugt ofan í hann.

„Þið [vælið] eins og stungnir grísir þegar maður svarar fyrir sig, það eru ekki allir viðskiptavinir velviljaðir og sanngjarnir, þeir sem starfa í veitingabransanum vita það, ég er bara einn þeirra sem svara fyrir mig þegar upp á mig er logið. Ef þú sérð eitthvað að þvi þá get ég ekki verið meira sama.“

Sem fyrr segir er þetta ekki í fyrsta sinn sem Tolli eða tilsvör hans rata á síður blaðanna.

Nú síðast gerðist það árið 2015 en Stundin greindi frá því að Pizzuhvíslarinn hafi hótað að siga handrukkurum á hjón í veitingarekstri. Hann hafði þá nýlega hætt störfum fyrir hjónin.

Í samtali við Stundina á sínum sagði hann hafa beðist afsökunar á hótuninni og sæi eftir henni.

„Slæmt umtal er betra en ekkert umtal,“ segir Tolli um umfjöllun Stundarinnar áður en hann hótar Heiðari að mæta á vinnustað hans á morgun og sjá til þess að hann verði rekinn eins og sjá má hér að ofan.

Kvörtun Heiðars, svör Tolla og umræðuna má sjá hér að neðan.