Þyrluflugmenn geta verið lofthræddir

Þorgeir Atli Gunnarsson er á tíunda ári. Hann heimsótti Landhelgisgæsluna á dögunum til að forvitnast um störf þyrluflugmanna og sigmanna. Fyrir svörum sat Þórarinn Ingi Ingason flugstjóri.

Þorgeir Atli: Hvað eru margir um borð hjá ykkur og hvað gerir hver?

Þórarinn: Við erum fimm um borð. Það er flugstjóri, flugmaður, aftur í kabínu er sigmaður sem fer niður í vírnum. Síðan er flugvirki sem stýrir spilinu og læknir sem sinnir sjúklingum og hann fer líka niður ef það þarf að síga.

Þorgeir Atli: Er erfitt að fljúga þyrlu?

Þórarinn: Það er tækni sem þarf að læra, eins og læra að keyra, hjóla eða labba jafnvel. Þegar maður er búinn að læra þetta þá er það eðlislægt. En svo getur verið erfitt að fljúga í mismunandi aðstæðum.

Þorgeir Atli: Eruð þið einhvern tímann stressaðir áður en þið farið að fljúga?

Þórarinn: Já, það kemur stress, við þurfum að hugsa um marga hluti og velta ýmsu fyrir okkur.

Þorgeir Atli: En lofthræddir?

Þórarinn: Oftast erum við ekki svo langt frá jörðu þannig að ég er sjaldan lofthræddur. En reyndar er ég lofthræddur, það reynir bara ekki mikið á það.

Þorgeir Atli: Hvað er skemmtilegt við starfið?

Þórarinn: Það er að njóta náttúrufegurðarinnar á Íslandi. Hún er alveg einstök.

Þorgeir Atli: Er hættulegt að fljúga þyrlu?

Þórarinn: Já, það er hættulegt ef það er ekki gert rétt.

Þorgeir Atli: Hvað gerið þið þegar þið eruð að fljúga þyrlu og þurfið að fara á klósettið?

Þórarinn: Við erum með svona poka um borð sem við getum pissað í, þá breytist það í gel.

Þorgeir Atli: Er sigmaðurinn aldrei hræddur við að fara niður, til dæmis þegar það er vont veður.

Þórarinn: Við hugsum um öryggi númer eitt, tvö og þrjú. Við gerum aldrei eitthvað sem er ekki raunhæft. En örugglega hugsar hann mikið um hvernig hann á að gera þetta til að gera þetta vel.

Þorgeir Atli: Eruð þið með einhverja hjátrú tengda vinnunni?

Þórarinn: Nei, eiginlega ekki. En ef eitthvað fer úrskeiðis og svo fer eitthvað annað úrskeiðis, þá hugsum við samt oft hvort það sé komin af stað einhver keðjuverkun sem leiðir okkur í ógöngur.



Þorgeir Atli: Hvað gerið þið þegar þið eruð ekki í útkalli?

Þórarinn: Þá erum við að undirbúa okkur, á námskeiði eða á æfingu. Eða að hvíla okkur. Við erum alltaf viðbúnir.

Þorgeir Atli: Getið þið lent hvar sem er á þyrlunni?

Þórarinn: Ekki á rúmsjó. En eiginlega alls staðar. Ekki á skipum reyndar, nema þau séu af þeirri stærð að það sé hægt. Í flestum tilfellum getum við lent, nema náttúrulega í brekkum og svona.