Farþega vísað frá borði vegna kynþáttahaturs

Bandaríkjamanni var vísað frá borði flugvélar United Airlines fyrr í kvöld fyrir að hafa valdið usla með óvægnum athugasemdum sínum í garð pakistanskra samfarþega sinna.

Atvikið átti sér stað skömmu fyrir flugtak en flugvélin var stödd á O‘Hare flugvellinum í Chicago. Samkvæmt sjónarvottum áreitti maðurinn pakistönsk hjón sem voru íklædd hefðbundnum pakistönskum fatnaði.

„Er þetta nokkuð sprengja þarna í töskunni þinni,“ spurði hann hjónin meðal annars.

Í kjölfarið hófust illdeilur við aðra farþega vélarinnar eins og sjá má í meðfylgjandi myndbandi.

Skömmu síðar bað flugþjónn manninn að taka saman föggur sínar og yfirgefa vélina.

„Hey, ég mun koma aftur og þá verði þið farin,“ hrópaði maðurinn að endingu.