Elon Musk býðst til láta laga skemmdir á Teslu manns sem bjargaði lífi annars manns

Elon Musk, frumkvöðull og eigandi bílaframleiðandans Teslu, hefur boðist til að láta laga skemmdir á Teslu manns sem fórnaði bíl sínum til að bjarga lífi annars manns sem sást rása á þýskri hraðbraut á dögunum.

Mashable segir frá því að hinn 41 árs gamli Manfred Kick hafi verið að aka Teslu Model S bíl sínum þegar hann tók eftir að Volkswagen-bíl var ekið undarlega á hraðbraut í úthverfum München.

Þegar Kick sá að ökumaðurinn virtist meðvitundarlaus undir stýri ákvað hann að keyra fram fyrir bílinn og hægja svo á báðum bílunum þar til að þeir voru báðir stopp.

Kick hraðaði sér svo að bíl hins mannsins og veitti manninum fyrstu hjálp á meðan aðrir hringdu í neyðarlínuna. Maðurinn virðist hafa fengið heilablóðfall og var hann fluttur á sjúkrahús. Líðan hans er stöðug.

Kick stóð hins vegar frammi fyrir að þurfa að borga fyrir skemmdir á bíl sínum, sem metnar voru á um 10 þúsund evrur, um 1,2 milljónir króna. Musk frétti af málinu og greindi frá því á Twitter-síðu sinni að hann byðist til að greiða fyrir allar skemmdir á bílnum.

Congrats to the Tesla owner who sacrificed damage to his own car to bring a car with an unconscious driver safely to a stop!

— Elon Musk (@elonmusk) February 15, 2017

In appreciation, Tesla is providing all repair costs free of charge and expedited. https://t.co/D68HNJcCoQ

— Elon Musk (@elonmusk) February 15, 2017