Langar að lesa ævisögu Michelle Obama

Allir lesa, landsleikur í lestri, fer fram yfir þorrann, eða dagana 27. janúar til 19. febrúar. Þetta er í þriðja sinn sem er blásið til keppninnar. Landsleikurinn hófst í gær með bókelskum farþegum í strætisvagni, þeirra á meðal var forsetafrúin Eliza Reid. Hún og eiginmaður hennar styðja lestrarátakið með ráðum og dáð og mynda lið með börnum sínum.

„Ég er að lesa nokkrar bækur núna. Á íslensku er ég að lesa eina af uppáhaldsbókunum mínum frá fornu fari, Morðið í Austurlandahraðlestinni. Ég var að ljúka við skáldsögu sem heitir The Best Kind of People eftir Zoe Whittall og sú næsta á listanum er Half Blood Blues eftir Esi Edugyan. Ég er líka að lesa Harry Potter og blendingsprinsinn fyrir eldri strákana mína tvo,“ segir Eliza.

Ertu með leslista? Hvað ætlarðu að lesa í átakinu?

„Ég er með tvær bókahillur fullar af bókum sem ég á eftir lesa. Þannig að þegar ég klára bók finn ég mér aðra í þessum hillum. Ég get nefnt skáldsögur eins og Do Not Say We Have Nothing eftir Madeleine Thien [hún var tilnefnd til Booker-verðlaunanna í fyrra] og Mánastein eftir Sjón. Af öðrum bókum en skáldverkum eru það t.d. Inconvenient Indian eftir Thomas King og Startle and Illuminate, en það er bók með textum um skrif eftir Pulitzer-höfundinn Carol Shields sem dóttir hennar og dóttursonur tóku saman eftir hennar dag. Mig langar líka til að lesa ævisögu Michelle Obama eftir Peter Slevin en á eftir að ná mér í hana.“

Elizu finnst erfitt að mæla með ákveðnum bókum.

„Af því að það er svo misjafnt hvað fólki finnst skemmtilegt að lesa. Ég hef t.d. gaman af alls konar glæpasögum, bæði frá Íslandi og öðrum löndum. Þegar ég er ekki alveg upp á mitt besta og langar bara til að kúra uppi í rúmi með bók finnst mér alltaf gott að lesa aftur bækur eftir Agöthu Christie. Jan Morris er einn af mínum uppáhaldsferðabókahöfundum en hún hefur skrifað í marga áratugi. Meðal uppáhaldsskáldsagnanna eru A Fine Balance eftir Rohinton Mystry og Regener­ation-þríleikurinn eftir Pat Barker. Ég hef gaman af alls konar endurminningabókum og fræðibókum, sérstaklega pólitískum æviminningum,“ segir Eliza.

„Þegar ég lít í bókahilluna mína sé ég sumar af uppáhaldsbókunum mínum, t.d. Blood and Sand eftir Frank Gard­ner, Infidel eftir Ayaan Hirsi Ali, In the Footsteps of Mr. Kurtz eftir Michela Wrong, og bók sem á kannski sérstaklega vel við þessa dagana, verðlaunabókina Walls eftir Marcello Di Cintio.“

Hver sem er getur skráð sig á allirlesa.is. Hægt er að keppa sem einstaklingur eða í liði og skrá niður þann tíma sem varið er í lestur.