Heiðurs- og bæjar- listamenn Kópavogs

Við Sigtryggur höfum verið samstarfsfólk, erum nágrannar og vinir, eigum stelpur sem eru saman í bekk og okkar leiðir hafa krossast af mörgum ástæðum. Um tíma voru við bæði í Sykurmolunum. Það var því gaman að vera útnefnd með honum til titla í Kópavoginum,“ segir Margrét Örnólfsdóttir, nýkjörinn heiðurslistamaður Kópavogs 2017. Hún segir engar kvaðir fylgja upphefðinni nema að bera titilinn í eitt ár og vera hvorki sér né bæjarfélaginu til skammar.

Nafnbót Sigtryggs, bæjarlistamaður Kópavogs 2017, fylgja hins vegar verkefni og ákveðin peningaupphæð sem hann hyggst nota til uppbyggilegs verkefnis með fólki í bænum á aldrinum tólf til sextán ára. „Mig langar að fá eitthvað af því unga fólki sem ég þekki í tónlistarbransanum á Íslandi til að kenna unglingunum í Kópavogi hvernig tónlist er unnin í dag í tölvum. Bærinn hefur þegar skaffað skólafólkinu spjaldtölvur sem nýtast vel í þessu verkefni.“

Sigtryggur bendir á að til staðar í Kópavogi séu ágætar stofnanir sem hafi sinnt vel tónlist, eins og Tónlistarskóli Kópavogs, Kársneskórinn hennar Þórunnar Björnsdóttur og Skólahljómsveitin sem Össur Geirsson rekur af myndarskap. „Þetta gæti verið nýjung á sviði tónlistarmenntunar í bænum. Ég mundi helst vilja koma þessu verkefni inn sem vali í skólunum. Þá kæmi fólk sem er að vinna í poppmúsík, og þessir krakkar hlusta á, og yrði með kynningarfundi. Ég kæmi þessu sambandi bara á, unglingskrakkar í Kópavogi í dag eru ekki að hlusta á mig almennt.“

 

Margrét og Sigtryggur hafa víða komið við

Margrét hefur samið tónlist fyrir leikhús og kvikmyndir, gefið út barnaplötur og fleira. Hún spilar á píanó og var hljómborðsleikari Sykurmolanna um tíma. Hún hefur unnið við dagskrárgerð fyrir útvarp og sjónvarp og skrifað barnabækur. Síðustu ár hefur hún verið afkastamikill handritshöfundur þátta, kvikmynda og leikhúss. Nú síðast skrifaði hún þáttaröðina Fanga.

Sigtryggur Baldursson hefur verið virkur tónlistarmaður allt frá níunda áratug síðustu aldar. Sveitir sem hann hefur spilað í eru meðal annars Þeyr, Kukl og Sykurmolarnir. Hann stofnaði Bogomil og Milljónamæringana og síðustu ár hefur hann einnig unnið að sjónvarpsþáttagerð og verið framkvæmdastjóri ÚTÓN, útflutningsskrifstofu íslenskrar tónlistar.