Stefnir í öruggan sigur hjá flokki Putin

Í dag fóru fram þingkosningar í Rússlandi en þá var kosið um 450 sæti í Dúmunni sem er neðri deild rússneska þingsins. Kjörstaðir í Rússlandi voru opnir til klukkan sex í dag en talið er að kjörsókn hafi verið um 40%.

Samkvæmt nýjustu tölum bendir allt til þess að flokkur Vladimir Putin, Sameinað Rússland, fari örugglega með sigur af hólmi í kosningunum en eftir að 11% atkvæða hafa verið talin er flokkurinn með rúmlega 46% fylgi. Fjórtán flokkar eru í framboði en næst á hæla flokks Putins kemur Frjálslyndi lýðræðisflokkurinn með rúm 17% atkvæða.

Verði þetta niðurstaðan er ljóst að Sameinað Rússland tapar nokkru fylgi frá því í seinustu þingkosningum árið 2011 . Flokkurinn hlaut þá alls 49,32% atkvæða en það tryggði þeim 238 af þeim 450 sætum sem í boði eru í Dúmunni.