Létust þegar sprenging varð í vopnageymslu í Bagdad

Tveir menn hið minnsta létust og ellefu særðust þegar sprenging varð í vopnageymslu í austurhluta íröksku höfuðborgarinnar Bagdad í morgun.

Lögregla greinir frá því að miklar sprengingar hafi orðið og mikill reykur stigið til himins í hverfinu al-Ubaidi, þar sem sjítar eru í meirihluta.

Í frétt SVT kemur fram að ekki liggi fyrir að svo stöddu hvort um árás hafi verið að ræða eða slys.

Vopnageymslan sem um ræðir er í eigu sveita sjítamúslíma sem berjast gegn hryðjuverkasveitum ISIS í landinu.