Fyrsta bílalestin lögð af stað frá Aleppo

Fyrsta bílalestin frá Aleppo með særða borgara og uppreisnarmenn er lögð af stað eftir sólarhrings seinkun.

Samkomulag á milli stríðandi fylkinga í borginni gerir ráð fyrir að hægt verði að flytja þúsundir manna frá austurhluta borgarinnar sem er svo gott sem fallinn í hendur stjórnarhersins eftir margra ára átök.

Um tvö hundruð manns eru sagðir vera í fyrsta hópnum sem fær að fara frá hverfinu og verður farið með fólkið yfir á svæði vestan borgarinnar sem er undir stjórn uppreisnarmanna.

Fréttir hafa borist af því að skotið var á fyrsta sjúkrabílinn sem ekið var út úr austurhlutanum. Þrír særðust í árásinni.

Hjálparsamtökin Rauði krossinn og Rauði hálfmáninn höfðu áður greint frá því að þau hefðu sjúkrabíla og um hundrað sjálfboðaliða sem reiðubúnir væru að taka þátt í brottflutningnum.

Rússneskir fjölmiðlar greindu svo frá því í morgun að að rússneskir hermenn myndu aðstoða við flutningana.

Talsmaður rússneska varnarmálaráðuneytisins segir að Sýrlandsstjórn hafi heitið Rússum að uppreisnarmenn í austurhlutanum og fjölskyldur þeirra fái að flýja óáreittir til borgarinnar Idlib, suðvestur af Aleppo, sem er undir stjórn uppreisnarmanna.