Hlýja og notalegheit í einni hönnun

Vinkonurnar Inga og Stína eru hugmyndasmiðir, hönnuðir og saumakonurnar á bak við hönnunarfyrirtækið Koffort. Ingibjörg Þóra Gestsdóttir er menntaður fatahönnuður frá Köbenhavns Mode og Designskole og Kristín Unnur Þórarinsdóttir er flugfreyja hjá Icelandair. Aðalhönnun þeirra er lopapeysa sem þær kalla teppapeysu en hún er dálítið frábrugðin venjulegri íslenskri lopapeysu.

Hugmyndin kviknaði að sögn Stínu í háloftunum og hún lýsir hönnuninni betur. „Hér sameinast í eina hönnun teppi, peysa og koddi, þannig að þetta er flík sem hefur mikið notagildi. Hugmyndin er að stóla á eigin hlýju og notalegheit; að geta hvílst vel á löngum ferðalögum auk þess að vera smart.“

Þannig er t.d. hentugt að mæta í peysunni í flug. „Þegar þú vilt leggja þig og hafa það náðugt þarf ekki að biðja um teppi,“ segir Inga. „Lykkjur eru losaðar af tölum sem eru á peysunni innanverðri. Við það losnar stórt og hlýtt lopateppi eða poki sem þú geymir á bakinu og þangað ofan í er köldum fótunum stungið.“

Frábær í ferðalagið

Hettan á peysunni er tvöföld og hefur tvenns konar tilgang að þeirra sögn. „Annars vegar getur þú rúllað allri teppapeysunni inn í hettuna og breytt henni í kodda sem auðvelt er að ferðast með. Hins vegar veitir hettan skjól, hljóðeinangrun og myrkur þegar þú vilt fá að hrjóta í friði eða fá næði.“

Auðvelt er að hengja teppið upp og breyta aftur í peysu í lok flugs. „Teppapeysan er frábær í ferðalögin og einnig mjög flott lopapeysa til daglegra nota fyrir bæði kynin. Þetta er snilldarhönnun fyrir kvöldkaffið á pallinum, fyrir sófann heima og ekki síst fyrir tjaldferðalögin enda geta íslensku sumarkvöldin orðið svöl.“

Tölurnar á teppapeysunni eru úr kindahorni, handgerðar úr smiðju Rítu Freyju í Borgarnesi. Peysurnar eru framleiddar í þremur stærðum og þremur fallegum litum. „Við erum alltaf að fá nýjar hugmyndir og erum duglegar að koma þeim í framleiðslu. Við erum t.d. að gera fallegar kápupeysur og barnapeysur ásamt alls kyns fylgihlutum. Núna fyrir jólin koma fyrstu herrapeysurnar á markað og erum við mjög spenntar fyrir þeim.“

Alíslensk hönnun

Þær segja fyrirtæki sitt vera umhverfisvænt og framleiðslan sé „slow fashion“ þar sem hver flík er handunnin þó að efnið sé vélprjónað. Því fari mikil natni og tími í hverja flík. „Ullin sem við notum kemur frá íslenskum bændum og prjónið er í höndum Glófa. Saumaskapurinn hefur nánast alfarið verið í okkar höndum. Við getum því sagt með stolti að um alíslenska hönnun sé að ræða.“

Þessa dagana er verið að uppfæra heimasíðuna koffort.is en á meðan má skoða vöruúrvalið á Face­book undir Koffort – Ice­landic Wool Design. „Peysurnar okkar eru líka seldar í yndislegri íslenskri hönnunarverslun á Laugaveginum sem heitir Jökla. Þar selja sautján íslenskir hönnuðir vörur sínar milliliðalaust til neytenda og standa sjálfir vaktina í versluninni. Einnig tökum við þátt í jólamarkaði í Kaupmannahöfn í fyrsta sinn nú í desember og hlökkum mikið til."

Þær hafa einnig tekið þátt í Handverkshátíðinni á Hrafnagili undanfarin ár sem er alltaf ævintýralega skemmtilegt að þeirra sögn. „Við vorum svo lánsamar að fá þar verðlaun árið 2012 en þá var teppapeysan okkar valin hönnun ársins, sem er mikill heiður. Við höfum einnig tekið þátt nokkrum sinnum í Handverki og hönnun í Ráðhúsinu en við náðum ekki að vera með þetta árið. Ætlum að láta Kaupmannahöfn duga."