Viðurkennir að myndin af þeim Bieber sé fölsuð en stendur við frásögnina

Kolbeinn Tumi Daðason skrifar 14. nóvember 2016 11:53

Sverrir Ómar Victorsson, sem fullyrti í kvöldfréttum Stöðvar 2 í gær að þeir Justin Bieber væru mestu mátar, viðurkennir að mynd sem hann birti af þeim vináttu þeirra til staðfestingar sé fölsuð. Þetta upplýsti hann í útvarpsþættinum Brennslunni á FM 957 í morgun.

Hann segist hafa verið fram á nótt að svara skilaboðum þar sem efast sé um að þeir Bieber þekkist yfir höfuð. Fréttastofa hefur ástæðu til að efast um frásögn Sverris í ljósi þessara upplýsinga.

„Hef ég heyrt þetta?“ sagði Sverrir hikandi í Brennslunni í morgun aðspurður um gagnrýnisraddirnar. „Já ég er búinn að heyra þetta.“

Segist hafa fengið svar tveimur árum seinna

Saga Sverris Ómars er í grófum dráttum á þá leið að árið 2013 hafi hann í eitt og hálft ár leitað að rétta netfanginu hjá réttum umboðsmanni Justin Bieber. Árið 2013 sendi hann Bieber tölvupóst og kynnti hann fyrir Íslandi. Tveimur árum síðar hafi Justin Bieber svo svarað honum, sagst myndu millilenda á Íslandi daginn eftir og spurt hvað hann ætti að skoða.

Sverrir segist hafa mælt með Suðurlandinu en hann er sjálfur af Selfossi. Hann hafi efast um að um Justin Bieber væri að ræða en daginn eftir hafi hann vaknað og fjölmiðlar hafi verið fullir af fréttum um að Justin Bieber væri kominn til landsins.

Ekki nóg með það heldur var stórbrotinn bílafloti sem sótti Sverri í skólann og vörðu þeir Justin í framhaldinu heilmiklum tíma saman. Hann hefði þó farið leynt með það til að glata ekki traustinu. Þeir hafi svo aftur hist fyrir tónleika Justins í Kórnum í sumar.

Myndin fölsuð

Máli sínu til sönnunar birti Sverrir fyrrnefnda mynd af þeim Bieber, sem nú kemur á daginn að er fölsuð. Ljósmyndari nokkur hafi „græjað myndina fyrir hann.“

„Raunverulega myndin af okkur má ekki fara í birtingu,“ segir Sverrir. Ástæðan sé sú að sú mynd sé tekin fyrir framan sumarbústað og eigandi bústaðarins hafi ekki gefið leyfi.

Myndin sem Sverrir birti til að sanna vinátttu þeirra Justins. Í ljós er komið að hún er fölsuð.

„Það fór ljósmyndari í það að reyna að fótósjoppa eitthvað drasl,“ segir Sverrir um fölsuðu myndina. Það komi honum illa núna, enda efist margir fyrir vikið um frásögn hans. Það sé óþægilegt.

„Já, ég var vakandi til hálf þrjú í nótt að svara skilaboðum. Síminn stoppaði ekki. Mér leið eins og Bjarna Ben á tímabili að reyna að mynda ríkisstjórn.“

Fréttastofa hafði samband við foreldra Sverris í gærkvöldi og þótti þeim engin ástæða til að efast um frásögn Sverris.

Ekki náðist í Sverri við vinnslu fréttarinnar. Viðtalið frá því í morgun má heyra í spilaranum að ofan.