Handtekinn vegna glúkósa

Sænskur karlmaður var á dögunum hnepptur í gæsluvarðhald eftir að nokkrir pokar með hvítu efni fundust í bíl hans. Bráðabirgðaprófanir leiddu í ljós að um hafi verið að ræða amfetamín og viðurkenndi maðurinn við yfirheyrslur að hafa geymt lítið magn af amfetamíni í bílnum.

Maðurinn dró þó aðeins í land með sögu sína nokkru síðar og sagðist einungis hafa verið með glúkósa, eða þrúgusykur, í bílnum. Efnin voru send til frekari rannsókna og í ljós kom að saga mannsins var sönn og var honum því sleppt úr haldi.

Sænska lögreglan segir í samtali við þarlenda fjölmiðla ekki vita til þess að mál sem þessi hafi komið upp áður. Bráðabirgðaprófanirnar teljist mjög öruggar og að alltaf eigi að vera hægt að treysta á þær. Hún baðst jafnframt afsökunar á málinu.

Í sænskum fjölmiðlum segir að ekki hafi fengist upplýsingar um hversu lengi maðurinn hafi þurft að sæta gæsluvarðhaldi né hvers vegna maðurinn hafi breytt upphaflegum framburði sínum. Þá kemur ekki fram í hvað maðurinn ætlaði að nota þrúgusykurinn.